Footer

Sultana (Maudi a paset)

Ababa a Sarita ni Jaime M. Agpalo, Jr.

**sampel ti counter clockwise structure wenno immatras a sarita

 

“’Ninana, isuda la ketdi!” inradies ni Doming ti misuotna. Imbaniekesna ti semsem ken suronna. Minulagatak met ken agsalsaludsod dagiti matak no asino dagita a mammapatay nga atapenna.

“Adda tallo a lallaki a limmabas itay mapanak mangruot iti minaisak dita linapogan. Nakaiggemda amin iti eskopeta, ken adda tallo a manganup nga asoda.”

Dagiti la ketdi dayo a mangnganup iti banias ken taga-kabangibang nga ili. Masansan ngamin nga arogenda ti kakaykaywan-kinawayanan iti amianan ta dita ti apon dagiti banias, dagiti nagduduma a billit ken beklat.

“Sadino ti nagturonganda?”

“Dita kakaykaywan dita amianan, ‘nong!”

Sintagari, kellaat nga immulo ti agburburek a darak. Pinanawak lattan ni Doming. Kinamangko ti dram a pagipempempenak kadagiti kostal ken siguran iti sirok. Inruarko ti iduldulinko a baby armalait ken imbulsak ti maysa a magasin a napno iti bala kalpasan a nasalpakak iti maysa pay a banana type a magasin. Nagdardarasak a rimmuar. Nalabsak ni Doming a nakatakder iti ridaw nga awan ti arimekmekna. Kinamangko ti kakaykaywan. Talaga a pumatayak. Ibalesko ni Sultana!

Ngem diak nasarakan dagiti nadangkok a tattao – ta ipainumko koma met kadakuada ti bukodda a sabidong. Naglikmutlikmotak, ngem napaayak iti gagarak. Nagturongak iti linapogan a bitbitko pay laeng ti armas, ngem awan ti tao a nasarakak. Nagsubliak manen iti kakaykaywan. Iti nalabes a pungtotko nga awan a pulos ti tao a nasarakak, nagikkis ti immalingawngaw a rapido. Naulit ken naulit.

Nasangpetak ni baket a kustuonay ti iriag ken bassawangna a nakapetpet ti kanawanna iti putan ti badang. Ab-abbongannan iti sako ti bangkay ni Sultana. Sumagmamanon dagiti lallaki iti purok ti immasibay iti paraangan. Dagiti laeng matada ti agsasarita.

“Di pay la koma mabtak ti aproda ken mabriat ti dalemda dagiti ‘nimal nga akin-aramid, pwe! No maammuak la no asinoda dagita nga ‘nimal, tagbatagbatek ida!” uray la nagikkis ti imsiag a lata ti Nido a kinugtaran ni baket ket nanabraang iti naurnong a binalsig a pagtungo iti sirok ti bayyabas. Binay-ak lattan ni baket, ket napankon indulin ti paltog.

Nakangngegak iti sumungad a motorsiklo manipud iti bit-ang iti laud. Rimmuarak. Ni Nestor a kayongko – maysa a polis ken naidestino iti ilimi.

“Nangiyasakaysa met? Tay sa met armalait ni kayong daydiay nagparakapak?” kinunana a nalabit a nangngegna la ketdi ti parakapak itay.

“Ni Manong Ben,” insungbat ni Doming, “adda nangoskopeta ken Sultana.”

“Ania?” iniddep ni Nestor ti motor. Kinitana ni baket a tumanabutob a mangisimsimpa ti abbong ti bangkay. “Kayatyo a sawen, natayen?”

Awan ti nagtimek kadagiti nagsaludsodan.

“Sinal-it dagita a tattaon, ‘ya! Dika pay la ket pinaratupot met ida!” makaunget metten ti kayongko.

“Awan met ngarud ti nakakita iti aktual a napasamak. Ngem adda tallo a mangnganup iti banias a limmabas iti purok – dagiti sigud nga umar-arog. Nalabit a sinurotna ida dita kakaykaywan,” kinuna ni Doming.

Manipud iti bit-ang iti laud, nakitak nga agdardaras nga agtartaray nga agturong iti balay dagiti dua nga annakko nga agis-iskuela iti elementaria – agarup a tallo gasut a metro ti kaadayona – gred tri ken gred paib; ti inaunaan, ni Albert, ket addan iti maikadua a tukad iti sekundaria ken agbasbasa idiay Narvacan Catholic School iti ilimi. Nalabit nga adda nangipakaammo kadakuada wenno nakaammuanda a natayen ni Sultana; ta kadagitoy nga oras ket tiempo pay la ti recess-da. Napatilmonak ta agrungaaben iti uray la ni Junjun nga immasideg iti naabbongan iti sako a bangkay. Inikkatna ti sako ket nagparintumengen a mangar-arakup ken ni Sultana. Kustuonayen ti anug-og ti buridekmi. Iti ruangan, immasngaad met ni Aprilene ti anug-ogna. Madlawko a saan nga ammo ti inada ti aramidenna iti dayta a kanito ta pumanagna a tumanabutob ken petpetna pay laeng ti badang. Dadakkel ken nauuneg dagiti angesko!

Kinamangko ti kulongan dagiti manok ket nangkemmegak ti maysa kadagiti palpalukmegenmi a dumalaga. Kinamangko ti ummong dagiti lallaki, ket binilinkon da Doming a partienda ti manok ta sapsapurikitenmi ta adda pulotanenmi. Inyawatak iti nabukel a dua a gasut a pisos ni Carlo nga igatangna iti dadakkel a GSM Blue.

Nagtitinnaliawda. Dagiti laeng matada ti agsasarita.

“Saantayo a partien ni Sultana ta imbilangmi a kameng ti pamiliami.” impalawagko. “Tulongandak man ketdi ta ikalitayo iti sirok ti langka.”

Nasakit unay ti nakemko, ta saankami ngatan a makataraken pay iti aso a kas ken ni Sultana. Naiborda iti nakem ken pusomi a sangapamilia ti imbatina nga imbag, sursuro ken lagip – ti aso ti kasayaatan a gayyem ti tao!

(Gibusna)

Comments are closed.