Footer

2 balay nasukisok, paltog, balbala, nakumpiska

NARVACAN, Ilocos Sur – Saggaysa a paltog ken balbala ti nakumpiska dagiti polis iti insayangkatda a panagsukisok iti dua a balay iti Barangay Orence ditoy nga ili idi malem ti Nobiembre 28.

Nakakumpiska dagiti nagsukisok iti balay ni Homer Clarin y Cambe iti maysa nga Armscor Cal. 45 pistol nga addaan Serial no. 1012155 ken 7 a bala para iti cal. 45; idinto a maysa a Colt Cobra Cal. 38 nga addaan Serial No. 21737, ken tallo a bala para cal. 38 iti balay ni Marman Adviento y Pader.

Awit dagiti polis ti search warrant a pinirmaan ni Judge Francisco Ante Jr. ti MTCC, Vigan City  a napetsaan iti Nobiembre 21 ken 24 idi insayangkatda ti panagsukisok iti balay dagiti suspek.

Naipan ni Clarin ken dagiti nakumpiska kenkuana iti police station. Awan ni Adviento idi maisayangkat ti panagsukisok iti balayna.#