Footer

Bala ti grenade launcher, granada, paltog, naisuko

GALIMUYOD, Ilocos Sur – Maysa a live ammo ti grenade launcher ti insuko ti maysa a polis iti police station ditoy idi sardam ti Nobiembre 23.

Ni PO1 Robert Sumakiab y Lucena, 26, PNP member ti Candon City, ken residente iti Barangay Bidbiday, ti nangisuko iti nasao a bala iti police station a mapapati a kukua ti ulitegna a maysa a retirado a kameng ti Philippine Army daytoy.

Nasarakan ti nasao a bala iti uneg ti kabinet ti ulitegna iti balayda iti Barangay Mabayag ditoy met laeng nga ili.

Naibaon dagiti personnel ti EOD daytoy nga opisina tapno kitaenda ti estado ti nasao a bala kasta met ti pannakaipaima kadakuada ti maysa a granada nga insuko ni Patac Barangay Captain Galutan iti polis idi Nobiembre 11.

Kabayatanna, maysa a homemade buckshot Gauge 12 nga awanan serial number ken bala ti insuko da Cuancabal Barangay Captain Rogelio Siruno ken Kagawad Filemon Castro iti Cabugao police station.

Nasarakan ti paltog iti maysa a waiting shed iti nadakamat a barangay idi agsapa ti Nobiembre 24.#