Footer

Dagiti Aparision ti Birhen sadiay Lourdes (Maudi a paset)

Salaysay ni Samuel Allan Esperanza

 Maika-18 nga Aparision

Hulio 16, 1858

 

Kas nadakamaten, manipud idi impalgak ti Babai ti naganna ken ni Bernadette, idi laengen Abril 7, 1858 ti naudi a panagparangna iti ubing. Saanen a nagparang pay manipud iti dayta a petsa. Saan metten a napnapan ni Bernadette iti groto.

Adu dagiti napasamak kadayta a panawen. Naserraan ti groto iti publiko ket naparitan dagiti tattao a mapan iti lugar ken agala iti danum iti ubbog.

Idi Hulio 16, bayat ti panagkararag ni Bernadette iti sanguanan ti altar ti Birhen – naipanagan daytoy iti Our lady of Mount Carmel nga agpiesta iti dayta nga aldaw – iti kapilia iti nasapa a sardam, nakarikna manen iti taringguyod a mapan iti groto.

Dagus a napan ni Bernadette iti pagtaengan ni Antina a Basile ket kiniddawna a kuyogenna a mapan iti groto.

Sabali a dalan ti sinurot dagiti dua agsipud ta kas nadakamaten, maipariten ti mapan iti groto. Iti dalanda, nasabatda ti sumagmamano a babbai ket simmurot dagitoy. Nagnada iti kapanagan ket nagtungpalda iti teppang ti karayan Give a kabangir ti kueba.

Nagparintumeng ni Bernadette ket rinugianna ti nagkararag. Apagbiit laeng, rimmaniag ti rupana sana inyebkas: “Wen! Wen! Adda’diay, is-isemannatayo manipud iti ballasiw!”

Idi dandanin lumnek ti init, nagpakada ti Babai ken ni Bernadette. Iniseman pay naminsan ti Babai ti ubing sa nagpukaw.

Saanton nga agparang pay ti Babai iti unos ti panagbiag ni Bernadette.

Ngem iti kaunggan ti ubing, makitananto manen ti Babai agsipud ta inkari daytoy kenkuana idi maikadua a panagparangna: “Diak ikari a naragsakka itoy a biag no di iti sumaruno”.

 

Dagiti Pagteng Kalpasan ti Aparision

 

Kas nadakamaten, saan a dagus a namati ti Simbaan kadagiti aparision iti Massabielle nupay naipakpakaammo dagiti napaspasamak bayat ti panagparang ti Babai a nangawag kenkuana nga Immaculate Concepcion.

Idi Hulio 28, nangbuangay ni Bishop Laurence iti Canonical Commission a mangkita iti kinaagpayso dagiti aparision ken kadagiti nairepreport a naag-agasan kalpasan nga imminum wenno nagdigosda iti danum a naalada iti ubbog.

Nangisayangkat ti Canonical Commission kadagiti interbio ken ni Bernadette ket iti baet ti kinabayag ken makautoy a panagsaludsodda, napnekda kadagiti sungbat ti ubing. Namatida a saan a pinarparbo ni Bernadette dagiti naireport a panagparang ti Babai kenkuana.

Idi Enero 1862, uppat a tawen kalpasan dagiti aparision, impaulog ti bishop ti pangngeddengna babaen ti maysa a pastoral letter.

Kastoy ti linaonna: “Ikeddengmi nga agpayso a nagparang ti Immaculate Mary, Mother of God, ken ni Bernadette Soubirous idi Pebrero 11, 1858, ken kadagiti simmarsaruno nga aldaw, sangapulo ket walo a daras amin, iti Grotto ti Massabielle, asideg ti ili ti Lourdes: a daytoy nga aparision ket ikutna amin dagiti marka ti kinapudno, ket rumbeng laeng a patien a pudno dagiti mamati. Sipapakumbabakami a mangidatag ti pangngeddengmi iti pangngeddeng ti Supreme Pontiff a nakaikomitaran ti Gobierno ti sibubukel a Simbaan.”

Iti 1876, maysa a kapilia ti nakonsegrada iti bato ti Massabielle, ngem agsipud ta saanna a malaon dagiti adu a tattao nga agbisita iti groto, sabali a simbaan ti naipatakder ket naawagan iti Basilica of the Rosary a nakonsegrada iti 1901.

Iti dayta met laeng a tawen, impalubos ni Papa Leo XIII a maipasdek ti maysa nga espesial nga opisina ken maselebraran ti misa para iti okasion.

Idi 1907, inkalawa ni Papa Pius X ti pannakarambak ti piesta iti sibubukel a Simbaan.

Iti agdama, daytoy a lugar ti maysa kadagiti kalatakan ken kaaduan ti bumisita a tattao, nangruna dagiti deboto ken dagiti addaan iti sakit a mangnamnama a maagasanda babaen ti milagroso a danum iti ubbog ti groto a nagparangan ti Immaculate Concepcion ken ni Bernadette Soubirous iti sangapulo ket walo a daras a nangrugi idi Pebrero 11, 1858.#

Comments are closed.