Footer

Exhibitionist, naipupok

VIGAN CITY – Sumango iti kaso ti maysa a lalaki gapu iti panangipakitana iti mabagbagina iti dua nga ubbing nga agbasbasa iti pagadalan elementaria ditoy siudad idi agsapa ti Disiembre 2.

Nupay pinaglibakan ni Fermin Arzadon, Jr., 34, residente iti Barangay Pantay Daya ditoy siudad, nga impakitana ti mabagbagina kadagiti dua nga ubbing nga agtawen iti 10 ken 12, inakona nga adda inareglona nga umasping a kasona iti napalabas.

Segun iti report, umis-isbo ti suspek iti maysa a lugar iti Crisologo Street ket idi limmabas dagiti ubbing, kellaat nga impakitana kadakuada ti mabagbagina.

Nagtaray dagiti dua iti kigtotda ngem mapapati nga impukkaw ti suspek nga agsublida tapno kitaenda ti mabagbagina.

Nagpulong dagiti dua iti dadakkelda ket dagitoy ti nagpulong iti polis.

Naduktalan ti kinasiasino ti suspek agsipud ta natandaanan dagiti ubbing ti numero ti traysikelna.

Iti pannakaisurat daytoy, nakapupok ni Arzadon idinto a maisagsaganan ti kaso maikontra kenkuana.#

Comments are closed.