Footer

Pagkakatawaan ti sangalubongan

Kalpasan ti dua a tawen, adda kadin nagdur-asan ti Maguindanao massacre?

Iti biang ti Amnesty International, nabuntog unay ti panaguyas ti hustisia para kadagiti biktima ti masaker iti baet a duan a tawen ti naglabas manipud idi mapasamak. Indagadag ti AI iti gobierno ti naparpardas a pannakadengngeg ti kaso tapno maited ti hustisia kadagiti biktima ken dagiti pamiliada.

Iti sabali a bangir, kinarit ti maysa nga obispo ti gobierno a kas kapardas koma ti panaguyas ti Maguindanao massacre iti inwayatna nga addang tapno mapadaras ti pannakaisaklang ni dati a Presidente Gloria Arroyo kadagiti mapapati a naglabsinganna iti linteg.

Maibilang ti Maguindanao massacre a naisayangkat idi  Nobiembre 23, 2009 a kadamsakan iti historia ti pagilian agsipud iti nakaam-ames a pannakapapatay ti 58 a tattao a nakairamanan dagiti 32 a kameng ti media.

Maipalagip a kimmuyog dagiti kameng ti media iti asawa ni Esmael Mangudadatu tapno ipilana ti sertipiko ti kandidatura daytoy para iti kinagobernador iti Comelec Office. Saan a nakadanon ti bunggoy iti papananda ta sinaneb ida dagiti mapapati a pasurot dagiti Ampatuan ket kasda la ayup a napapatay sa naikali.

Maysa kadagiti mangpabuntog iti panaguyas ti kaso dagiti panagmaniobra dagiti abogado dagiti akusado a pangtaktak iti panaggunay ti kaso, kas iti panangdawatda nga ag-inhibit ti hues a nakataktakan ti kaso iti aganay walo a bulan.

Ekspektaren pay dagiti abogado ti depensa nga umabot iti 18 a tawen sakbay a makumpletoda a maipresenta dagiti nasurok 325 a testigoda. Iti sabali a bangir, saan a nakurkurang ngem 300 met dagiti saksi a panggep ti prosekusion nga ipresenta. Iti daytoy a kaaduda, dekadekada a tawen ti lumabas santo maiwakasda amin a mapagsaludsodan babaen dagiti abogado ti prosekusion ken ti depensa.

Makunami: apay a saan nga ikabassit ti prosekusion dagiti saksina ket dagiti laeng nangnangruna a makatulong iti pannakagun-od iti hustisia kadagiti biktima ti ipresentada?

Kasta met nga apay a saan koma a dagiti primaria nga akusado  ti pakaisentroan ti imatang ti prosekusion – dagiti pamilia ti Ampatuan – agsipud ta dagitoy ti maitudtudo nga adda iti likudan ti pammapatay.

Iti daytoy a kaso, agdagup amin iti 196 dagiti defendants, ket tunggal maysa, sumango iti 57 a kaso. No mausig amin a saggaysa dagiti kaso, umabot dagitoy iti 55,000 a tawen santo agbanag, kas kuna ti maysa nga abogado.

No kastoy laeng, pagkakatawaan ti sangalubongan ti klase ti pannakaipakat ti hustisia iti pagiliantayo.#