Footer

Saan a mailinteg ti biddut ti sabali a biddut (Umuna a paset)

Ababa a Sarita ni Ronald M. Azurin

 NAGUNGGON ti abaga ni Mark.

“Manilan, padre,” kinuna ti konduktor.

Inwaras ni Mark ti panagki-tana iti aglawlaw. Isu laengen ti nabati iti lugan. Iti ruar, mangrugin nga agsaknap ti lawag.

Ginaw-atna ti bagna, insalapayna ti diaketna ket immulog iti bus. Bimmallasiw iti kalsada sa nangpara iti taksi. Nagpaitulod iti pagdagusan ni Liza.

Di nagawidan ni Mark ti isem a nagtammidaw iti bibigna iti panaganninaw ti ladawan ni Liza: napudaw, pamestisaen ken kariniosa. Dagitoy a saguday ti nangkayaw kenkuana ket nalipatanna nga addan asawa ken dua nga annakna.

Mammartek ken mannugal ti asawa ni Liza. Saan ngarud a nakakaskasdaaw a sapulen ni Liza ken ni Mark ti bara a dina mananam iti denna ti lakayna.

Impambar ni Mark idi agusisa ni Marie nga adda asikasuenna iti Manila. Ngem tulagda ken ni Liza nga agsarakda iti siudad. A, kukuada manen ti lubong iti tallo nga aldaw!

Nasinga ti panagparparmata ni Mark idi agsardeng ti taksi iti sango ti apartment a pagdagusan ni Liza. Nagplete. Impallailangna ti sintunado a sagawisiwna idi agtimbre iti ridaw.

Inlukat ni Liza ti ridaw. Kadigdigosna ken agin-inakbay ti banglona. Nakaputot laeng. Napatilmon ni Mark idi mataldiapanna ti aaprosan a muldotan a luppo no Liza.

“Apay nga itaka laeng?” adda pasugnod ti timek ni Liza.

“Adda ngamin report nga inkamakamko,” insungbat ni Mark idinto nga inwarasna ti panagkitana iti salas. Agmaymaysa ni Liza.

“Mabisinka ngatan,” kinuna ni Liza. “Agurayka ta idasarko ti pammigatta.”

“Bay-am pay dayta,” kinuna ni Mark ket ginuyodna ni Liza sana inarakup.

“Agtutorka kadi,” agkatkatawa ni Liza nga nangiduron ken ni Mark. Nagkinni a nagpakusina.

Naimas ti pammigat nga indasar ni Liza. Talaga a sinaganaanna. Kaarigda ti apagkallaysa a nagsinnubo.

Nagsinniketda a nagpasalas. Kinarawa ni Mark ti bulsana ngem awanen ti sigariliona. Linuktanna ti bagna tapno iruarna ti reserbana. Nasdaaw ta napuskol a sobre ti nakarawana. Binukitkitna. Pasaporte, tiket nga agpa-Los Angeles, traveller’s checkbook ken dadduma pay a papeles. Kukua ni Edgar Aleson, 26, naasawaan ken taga-Narvacan, Ilocos Sur.

Namatmatanna ti bag. Kaarngi la unay ti bagna!

“Kasanon dagiti aruatem?” nagmulagat ni Liza.

Timmawag ni Mark iti terminal. Imbagana ti napasamak.

“Naimbag ta immawagka,” insungbat ti dispatcher. “Immay sinapul ni Mr. Aleson ti bagna. Agluas kano nga agpa-Los Angeles iti alas otso ita a bigat.”

Kinita ni Mark ti oras. Alas nueben. Nakaluasen ti eroplano.

Inted ti dispatcher ti adres ni Aleson.

“Madamdama daytan,” dimmenden ni Liza. Narikna ni Mark ti natangsit a barukong a naidennes iti takiagna.

Bimmara. Inarakupna ni Liza. Nagdingpil dagiti bibigda.

NAGTUGTOG ni Mark iti ridaw. Timmungraraw ti maysa a lalaki a pattapattana a ni Edgar Aleson. Agkataebda. Panguloten ti buokna. Adda pamuyaanna.

“Ania ti masapulmo?” sinaludsodna ket nalang-ab ni Mark ti agat-arak a sang-aw daytoy.

“Umayko isubli ti bagmo,” insungbat ni Mark.

“Sika gayam ti nakasinnukatko,” kinuna ni Aleson ket inlukatna ti ridaw.

Nataldiapan ni Mark ti sangabotelia nga arak iti bassit a lamisaan. Naguduan ti linaonna.

“Ladingitek ti napasamak,” nakuna ni Mark. “Namitlo nga immawagak ngem awanka.”

“Basolko, nagbiddutak iti pinidutko a bag,” insungbat ni Aleson.

Nangiruar ni Edgar iti baso. Binukbokanna iti arak. Inyawatna ken ni Mark.

“Uminomta,” kinunana, “gapu iti saan pannakatuloy ti biahek.”

“Dimo koma riknaen unay ti napasamak,” inyandingay ni Mark. “Makapankanto met laeng.”

“Pudno. Ngem ania pay ti mamaayna? Simminan ni Lilibeth.”

“Sino a Lilibeth?”

“Asawak.”

Insungo ni Edgar ti pagiwarnak iti sopa. Binuk-bokanna ti basona. Intanguapna. Awanen ti naguneg ti baso idi idissona.

Pinidut ni Mark ti pagiwarnak. Naipasabat kenkuana ti paulo ti damag: 150 ti natay iti bimtak nga eroplano!

Binasana: Awan ti nakalasat a pasahero idi bimtak ti naglugananda nga eroplano gapu iti pannakadadael ti makinana.

Segun iti inisial nga inbestigasion, naammuan a gimmil-ayab ti makina ti eroplano duapulo a minutos kalpasan a timmayab iti airport nga agturong iti Los Angeles…

“Ni Lilibeth ti maysa!” nagbanarabar ti timek ni Edgar.

“Makipagladingitak iti napasamak,” impatay ni Mark ti dakulapna iti abaga ni Edgar.

Saanen a nagbayag ni Mark. Pinanawanna ni Edgar a nakamulengleng iti adayo.

(Maigibusto)

 

Comments are closed.