Footer

Kapolisan, nagkumpiska mailaklako nga illegal a paputok

BANTAY, Ilocos Sur – Bassit ti bilang dagiti biktima ti paputok gapu iti nainget a kampania ti kapolisan kadagiti illegal a paputok iti isasangbay ti 2012.

Dua laeng dagiti naireport a nabettakan iti paputok idinto a lima a tattao ti natamaan iti naiwawa a bala ditoy probinsia iti panangsarabo dagiti umili iti baro a tawen.

Nainaganan dagiti nabettakan iti paputok a da Joshua Tubon, residente iti Barangay Napo, Magsingal, Ilocos Sur, ken ni Ian Babagaya, residente iti Barangay Patong, Magsingal, Ilocos Sur. Nagsagrap dagiti dua a biktima iti dunor iti imada a naputokan iti paputok.

Lima met a tattao a pakaibilangan ti tallo ti tawenna nga ubing ti nagbalin a biktima ti stray bullet idi dandani sumangbay ken sumagmamano nga oras kalpasan ti isasangbay ti baro a tawen.

Nainaganan dagiti biktima a da Aldred Valdez y Marbel, 3, residente iti Barangay Calongbuyan, Candon City; Franklin Espejo, 36, ken residente iti Barangay Tamurong, Sta. Catalina; Alvin Villegas y Lucero, 30, naasawaan ken residente iti Zone 4, Bantay; Adrian Javier y Cardenas, 29, naasawaan ken residente iti San Julian Norte, Vigan City; ken Jocelyn Montero y Divina, 20, balasang, ken residente iti Barangay Dinalaoan, Narvacan, Ilocos Sur. (Basaen ti kaapiringna a damag. – Ed)

Posible nga ad-adu pay dagiti biktima ti paputok no saan nga iningetan ti kapolisan ti pannakaiparit ti pannakailako dagiti illegal a paputok.

Idi bisperas ti Baro a tawen, nangisayangkat dagiti nagtitipon nga elemento ti Ilocos Sur PPO, ISPPS ken RID PRO1 nga indauluan ni Deputy Chief POPB, Police Chief Inspector Rex B. Buyucan ken PInsp. Jurex Urbano, Team Leader ISPPSC iti nagsasaruno nga operasion kadagiti mailaklako nga illegal a firecrackers ken pyrotechnic devices manipud iti Bantay agingga iti San Juan ken iti Santa agingga iti Santiago.

Nakakumpiska dagiti polis iti nasao nga operasion iti 128 boxes a paputok a pakaibilangan ti 94 boxes ti Five Stars, 30 boxes ti Picolo ken 4 boxes ti PlaPla kas sumaganad:  Bantay – 16 boxes ti Five Star, 4 boxes plapla, ken 14 boxes Picolo; Sto Domingo – 5 boxes Five Star; Magsingal – 30 boxes Five Star, ken 6 boxes Picolo; San Juan – 25 Boxes Five Star ken 10 Boxes Picolo;  Narvacan – 5 Boxes Five Star; ken Sta. Maria – 13 Boxes Five Star.

Kabayatanna, nangiwayat met ti Candon police station nga indauluan ni PSI Providencio Calibuso, DCOP, iti nagsasaganad a panagraut kadagiti mailaklako nga illegal a paputok iti Barangay San Juan ken City Proper daytoy a siudad idi alas 9:00 ken 10:00 ti bigat ti Disiembre 31.

Nakakumpiska dagiti polis iti 1 Pack a Lolo Thunder, 8 Packs 105 boxes a Piccolo, 5 Plapla, 5 Baby Rocket, 1 Pack – Five Star, 2 bundles a Firecracker Cord, 1 pedaso – Fountain, 2 plastic bag  ti luses and 1 Box ti Pop-pop.

Nupay kasta, awan ti naaresto dagiti polis nga aglaklako kadagitoy illegal a paputok.#

Comments are closed.