Footer

2 natiliw iti buy bust operation, balay sinukisok dagiti polis

STA. MARIA, Ilocos Sur – Dua a nagsaruno a buy bust operation ti insayangkat dagiti nagtitipon a grupo dagiti polis iti dua a masuspetsa nga aglaklako iti droga ditoy nga ili idi agsapa ti Enero 23 a nakasamsamanda iti mapapati a maiparparit nga agas.

Immuna nga insayangkatan iti buy bust operation dagiti nagtipon nga elemento ti PDEA Region 1, PAIDSOTG ISUR PPO, nga indauluan ni PCI Sosimo Raquepo Racho ken ti Sta Maria police station nga indauluan ni PSInsp. Federico Donato Calibuso idi agarup 9:50 ti bigat ti Enero 23 ni Alma Directo y Cruz, 35, awanan asawa ken residente ti Barangay Baliw-Laud, ditoy nga ili a nagresulta iti pannakakumpiskada iti vulcanizing shop ti suspek iti nadakamat a barangay iti dua a babassit a heat sealed plastic sachet a mapapati a naglaon iti shabu nga agdagsen iti .1 gramo nga agbalor iti P1,180.00;  maysa a P500; ken 5 a sag-P100.

Naidatagen iti provincial prosecutor’s office, Vigan City ti kaso a panaglabsing iti RA 9165 maikontra ken ni Directo.

Iti agarup alas 11:00 ti bigat iti dayta met laeng a petsa, nangisayangkat ti nasao met laeng a grupo iti sabali a buy bust operation maikontra ken ni Enrie Mendoza III y Manuel, aka Arrie, 36, naasawaan, clerk iti Provincial Agrarian Reform Office ken residente iti Barangay Poblacion Norte, ditoy met laeng nga ili ket nagresulta iti pannakakumpiskada iti tallo a babassit a heat sealed plastic sachet a naglaon iti mapapati a shabu nga agdagsen iti .2 grams nga agbalor iti P2,360.00, marked money a P1,000 iti met laeng vulcanizing shop ni Alma Directo iti Barangay Baliw.

Naipan ti suspek iti Sta. Maria police station para iti umisu a disposision.

Naidatag metten ti kaso a panaglabsing iti RA 9165 maikontra ken ni Mendoza.

Kabayatanna, nangisayangkat dagiti nagtipon nga elemento ti ISPAIDSOTG, ISUR PPO, PIB ken ti Candon City police station nga indauluan ni PSI Providencio Calibuso babaen ti direkta a superbision ni Chief of Police, PSupt. Marlo Castillo ken babaen ti koordinasion ti PDEA RO1 iti panagsukisok  iti balay ti maysa a managan Joel Pascua y Custodia, 37, baro, ken residente iti Barangay San Isidro, Candon City ket nakakumpiskada iti maysa a kayo a paso a naglaon iti masuspetsa a napagango a bulong ti marihuana, 2 a disposable lighters, 62 a silulukat a transparent plastic sachet, maysa nga strip ti aluminum foil ken maysa a rolio ti aluminum foil.

Naipan ti suspek agraman dagiti nakumpiska kenkuana iti police station ti Candon City para iti umisu a dokumentasion ken naipresenta iti maseknan a korte idinto a naidatag dagiti mapapati a droga iti crime lab ti PNP iti Bulag, Bantay, Ilocos Sur para iti pannakaamirisda.

Sinaksian dagiti opisial ti barangay ti nasao a panagsukisok nga inyisio ni Judge Francisco Ante, Jr..#

Comments are closed.