Footer

3 naitawtaw mangngalap, naalaw iti baybay

SANTIAGO, Ilocos Sur – Baro a biag kadagitoy a mannalon a residente ditoy nga ili kalpasan a naalawda dua nga aldaw kalpasan ti pannakapattog ti bilogda bayatda ti panagkalapda iti baybay.

Tallo nga aldaw ken dua a rabii a nagpataw da Rodel Lapena, 27; Roy Rapada, 32; ken Antonio Tadena Jr., 42; agpapada a residente iti San Roque, Santiago, Ilocos Sur iti maysa a payao agingga iti nasalamaan ida ti padada a mangngalap.

Iti interbioda iti DZTP Radio Tirad Pass, kinuna dagiti mangngalap a timmapogda iti baybay iti agarup 5:00 ti parbangon ti Enero 19 ket idi addadan iti taaw, pimmigsa ti angin ken dimmakkel dagiti dalluyon a nakaigapuan ti pannakapakbo ti bilogda.

Nagpataw dagiti tallo iti kabaybayan agingga iti nakakitada iti payao ket ditoy ti kimpetanda agingga iti adda nangarayat kadakuada.

Dua a mangngalap a taga-Dili, Sta. Cruz a napan nagkalap iti taaw ti nakasalamaan kadagiti tallo a kumkumpet iti payao ket dagitoy ti nangilugan kadakuada a nagpaigid.

Malaksid iti bisin ken wawda, napigsa pay laeng dagiti mangngalap idi maalawda.

Kasla pagpiestaan ti Barangay San Roque iti kaburnok dagiti simmarabo kadagiti tallo a mangngalap idi maisangpetda iti barangayda idi Enero 21.

Segun iti maysa kadagiti mangngalap, agtuloyda latta nga agkalap iti baet ti napasaranda agsipud ta daytoy laeng ti pagsapulanda.#