Footer

41 balay iti upland town, napasilawan

SAN EMILIO, Ilocos Sur – Nalawag itan ti rabii para kadagiti uppat a pulo a balay a naipatakder kadagiti nasusulinek a barangay daytoy nga ili kalpasan a winarasan ida ni Gov. Luis “Chavit” Singson iti “Pailaw Kit”.

Segun ken ni Mayor Ferdinand Banua, dagitoy a balbalay ket saan a madanon ti linia ti koriente gapu iti kinaadayoda iti sentro dagiti barangay isu nga agtaltalinaed a de gas a lampara ti ar-aramatenda a silaw.

Naglaon ti nasao a kit iti bombilia ken solar panel nga agadaw iti enerhia manipud iti init ket dagitoy ti maurnong para iti pannakausarna iti rabii.

Kinuna ni  Singson a rugi pay laeng daytoy ti panagiwarasda iti kastoy a ramit ket manamnama a kalpasan a maammuanda dagiti balay nga awanan pay iti linia ti koriente iti sibubukel a probinsia,  maikkan amin dagitoy iti Pailaw Kit a mangitunda iti pannakapataud ti elektrisidad iti aminen a pagtaengan iti Ilocos Sur.

“Gapu ta adu a paset ti probinsia ti kabambantayan a narigat a madanon ti linia ti koriente, daytoy solar electricity ti kadarasan a wagas tapno maikkantayo iti lawag ti amin a balay,” kinuna ti gobernador.

Mainaig itoy a banag, inawat a mismo ni Mayor Ferdinand Banua kasta metten dagiti lideres ti ili a San Emilio karaman pay dagiti nakabalubalna iti kinamayor iti nadakamat nga ili dagiti kit idi Enero 24.

Kinuna ni Banua a daytoy ti wagas dagiti dadaulo ti San Emilio tapno ipakitada iti gobernador a kalpasan ti panagrurupakda iti politika, sangsangkamaysada  amin para iti pagsayaatan ti ilida.#