Footer

‘No helmet, no travel policy’ di naitaltalek; resulta: 2 motorista natay iti aksidente

CANDON CITY – Iti baet ti pannakaipakat ditoy siudad iti no helmet no travel policy, dua a motorista nga awanan iti protective head gear ti nainbolbar iti aksidente idi Enero 23 ken 24 a puon ti nakatayanda ken nakasugsugatan dagiti inliabarda.

Naammuan iti police blotter ditoy nga awan ti aruat a helmet da Jeffrey Bayod y Cadica, 18, baro, ken ni Adonis Salgado Toquero, 29, baro ken residente iti Barangay Patpata Segundo, ditoy met laeng siudad.

Iti inisial nga inbestigasion ti polis Candon, agpada ti amarilio a Honda XRM a  minaneho ni Bayod ken kalubbonna ni Wilfred Martez, Jr. y Ayson, 17, ken ti nalabaga a Suzuki Shogun a minaneho ni Melhon Layugan y Martez, 17, baro, ken nakiluganan ni Audi Gamileng y Martez, 17, agpapada a residente iti Barangay Tamac, Villaviciosa, Abra, nga agdaldaliasat nga agpalaud ngem iti nagkurbaan ti kalsada a sakup ti Barangay Darapidap,  napukaw ti kontrol ni Bayod iti motorsiklona ket tinurong daytoy ti akin-abagatan nga abaga ti kalsada sana dinungpar ti poste ti koriente.

Gapu iti pigsa ti pannungpar, naipalladaw ni Wilfred Martez iti kalsada ket pinilidan ti Shogun motorcycle sa natumba daytoy.

Naitaray da Bayod, Martez ken Gamileng iti Saint Martin de Porees Hospital, Candon City ngem naideklara ni Bayod a dead on arrival.

Natukkol ti pungupunguan ni Martez ken nagsagrap iti dundunor iti nadumaduma a paset ti bagina idinto a nadundunor da Gamileng ken Layugan a naitaray iti Resonable Hospital ditoy met laeng siudad.

Segun iti polis, awan ti aramat dagiti biktima a helmet ken nakainomda.

Kabayatanna, dinungpar ti Honda TMX motorcycle a minaneho ni  Salgado  ti maysa a minibus a nagmarka iti Dahlia’s Special a nakaparking  iti asideg ti Eat and Eat Restaurant iti asideg  ti kalsada nasional a sakup ti Barangay Bagani Campo ditoy nga ili idi agarup 10:00 ti rabii ti Enero 24.

Segun iti drayber ti minibus a ni Marlon Liclican y Gamalinda, 35, naasawaan, ken residente iti Barangay 32, Aguioas, Naguilian, La Union, umuneg koma iti restaurant tapno mangan idi nakangeg iti kanabtuog ket idi taliawenna ti naggapuanna, nakitana laengen ti motorsiklo iti makannawan a sungo ti bus ken ti biktima a nakadalutaytay iti abay ti luganna.

Naitaray ti biktima iti Saint Martin de Porres Hospital ngem indeklara ti attending physician a dead on arrival.

Awan met ti inaramat ti biktima a helmet ken positibo a nakainom.

Maipakpakat ditoy siudad ti ordinansa a “no helmet no travel policy” ngem adu latta dagiti motorista a di mangitaltalek iti daytoy ket pinullon dagiti tiniliw dagiti polis ken pinagmultada gapu iti panaglabsingda iti ordinansa.#