Footer

Dagiti Sangaili iti Lubong

Iti daytoy nga aldaw, saanen a maliklikan ti panagsabat ti dua a personipikasion ken ad-adda a maawagan a dagiti naisangsangayan a sangaili iti lubong. Panagsabat, ta maysa kadakuada iti agpakada, idinto ta maysa met ti sumangbay. Ti agpakada ket maysa a lakay. Ti sumangbay ket maysa met nga ubing.
Iti biag ti tao, saan a maliklikan ti panagpakada ti lakay ken ti isasangbay ti ubing. Saan a maliklikan ti panagpakada ken isasangbay dagiti sangaili iti lubong.
Adda kaipapanan ti panagpakada ken isasangbay. Pakapidutan iti adu nga adal ken sursuro, dagiti tagipatgen ken napateg a kaipapanan iti biag. Adda napateg a sumangbay, adda met napateg nga agpakada. Uray iti mismo a tao ket sangaili met ditoy lubong, napadasanna met ti simmangbay ket agpakadanto met laeng. Isu a mayat man ken saan, naikur-iten iti biag ti tao ti panagpakada ken isasangbay.
Iti mugingmi, makitkitami ni Apong Lakay, naisem nga agpakada. Naraniag latta dagiti matana nga agpakada a mangipasimudaag iti kinaadda raniag ti biag nga ibatina. Ti isemna a di agkesmay ket nangibudi iti dakkel a namnama iti masakbayan. Ti kinataona ti pakabuklan met laeng ti kinaasino ti tao. Agpakadan. Ket daytoy a panagpakada ni Apong Lakay, amin ket selebraran iti maudin a kanitona, ta inton bigat, maysa laeng a lasag ken dara ti kalman. Agpakadan, ngem saanto a pulos a malipatan. Kastan, Apong Lakay!
Iti panangselebrar iti ipapanaw ni Apong Lakay, ikankanayon wenno itarapnos metten a pasangbayen ti sabali manen a sangaili—ti ubing. Siraragsaktayto a mangpasangbay iti ubing. Siraragsak ta sapay koma ta iti isasangbayna, sumangbay met ti dakkel ken adu a dur-as ken balligi, babaen iti napaspasnek pay a panaggunay, panagtrabaho ken panangsirmata iti naraniag a turongen iti masakbayan. Napateg la unay ti isasangbay ti maysa nga ubing, ta itdenna iti sabali manen a namnama, pammati ken ayat a mangitunda iti pannakapnek. Naimbag nga isasangbaymo!
Napadasantayo amin ti nagubing—ti nagbalin a maladaga a ray-aw dagiti nagannak. Kabuyog dayta a ray-aw ti namnama, pammati ket ayat. No mataengan ken inton agpakadatayon, ibatitayo dayta a namnama, pammati ken ayat.
Simmangbaytayo iti daytoy a lubong, kas maysa a maladaga. Maysa a naisangsangayan nga abut iti dimmalanantayo nga immay ditoy lubong. Inton intay agpakada ditoy lubong, sumrektayonto manen iti sabali pay a naisangsangayan nga abut, a tunggal dumteng ti panangilagip kadatayo dagiti pinanawantayo, sarungkarandanto dayta nga abut nga intay sinerrek.
Wen,  dakkel ti kaipapanan dagitoy a personipikasion iti biagtayo a rumbeng a saluadan ken yallatiw iti sumaruno a kaputotan. Taginayonen koma ti pakaitarusanna.
Naragsak a baro a tawenyo amin! @