Footer

194th Founding Anniversary, sinelebraran ti I. Norte, Kapitolio naluktan iti publiko

Ni Florante A. Nicolas, PGIN- CMO

LAOAG CITY – Rinibribu a tattao ti mapattapatta a nakitipon iti selebrasion a panangrambak ti gobierno probinsial iti Maika-194th Foundation Anniversary idi Pebrero 2.

“Adu dagiti rason nga agselebrartayo – nasayaat a panangituray, ad-adu nga investments a simrek, dumur-dur-as nga industria ti turismo, ken napigpigsa ngem iti kallabes ti public-private partnership… ad-adu ti rasontayo nga agselebrar gapu kadagitoy positibo a developments,” kinuna ni Gov. Imee R. Marcos bayat ti panangidaulona iti selebrasion iti daytoy nga aldaw a dinar-ayan ti mapattpatta a 10,000 a tattao.

Iti 8:00 ti bigat daytoy nga aldaw, Huebes, naangay ti ecumenical prayer iti provincial capitol grounds a sinaruno ti pannakaisa ti bandera nga inatendaran dagiti opisial ti lokal a gobierno ti dua a siudad ken 21 a munisipalidad iti probinsia, ken dadduma a sangaili manipud iti publiko ken pribado a sektor.

Naisaruno ti pannakabendision ti kaipaspasdek a lobby offices ti INVEST ken PSWD iti uneg ti provincial capitol, ti Museo Vivo Garden, ken ti La Tabacalera Ilocano Lifestyle Center a nangabaruanan manipud idi nagtugaw ni Gov. Marcos iti puestona.

Sabali pay nga aktibidad iti daytoy nga aldaw ti “Open Capitol” no sadino a naluktan amin dagiti opisina ti gobierno iti publiko tapno ad-adda pay nga agbalin a pamiliar kadagiti umili kasta met kadagiti bisita dagiti serbisio publiko nga ipaay dagitoy nga opisina.

Kabayatanna, naipasdek dagiti nadumaduma a puesto iti Aurora Park no sadino a mabalin nga agparetrato ti publiko iti photo booth, body arts kas iti permanente a tattoo ken face painting, maysa a freedom wall a pagdrowingan wenno pagiladawan dagiti artista iti ayatda iti arte ken dadduma pay a booth a nairanta a manglinglingay iti publiko.

Kas paset ti anibersario, nakikammayet ti gobierno probinsial iti Northwestern University a nangangay iti job fair iti Laoag City Amphitheatre a nangipaay kadagiti agbirbirok iti trabaho iti gundaway a maiyempleo ditoy wenno iti ballasiw taaw.

Naangay pay ti “Ragragsak iti Aurora Park” iti alas 4:00 ti malem a nakaipabuyaan ti maysa a mini concert ken “showcase-your-talent” show.