Footer

Balay agassawa nga abogado, natakawan

STO. DOMINGO, Ilocos Sur – Sabali manen a panagtakaw ditoy probinsia ti naisayangkat idi Enero 29 a nakakurimesan dagiti kuarta ken dadduma a sanikua ti agassawa nga abogado nga agnaed iti Barangay Parada ditoy nga ili.

Nagreport iti polis ditoy ni Atty. John Rey Dolor Querubin, 31, agpapaay nga abogado iti public attorney’s office iti Vigan City, a sinerrek dagiti mannanakaw ti balayna idi rabii ti Enero 30 ket intarayda dagiti kuarta ken sanikuada nga agassawa.

Iti panagimbestiga dagiti polis, naammuan a nakastrek dagiti mannanakaw iti uneg ti balay babaen ti yuulida iti maikadua a kadsaaran ken iseserrekda iti nadadael nga steel window iti akin-amianan a paset ti pader.

Kinurimes dagiti di pay nabigbig a mannanakaw ti maysa a laptop, Olympus camera, P20,000.00 cash, lisensiado a cal 9mm pistol/CZ model C2075 RAMI nga addaan serial number A0702373 nga agpateg iti P45,000.00 ken ti bag ni Atty. Fatima Vitamog-Querubin a naglaon iti P5,000.00 ken dadduma pay a personal a belongings.

Nasarakan dagiti inbestigador ti laptop ken dadduma a personal belongings dagiti biktima iti kataltalonan agarup 40 metro ti kaadayona iti pagtaengan dagitoy.

Kas kiddaw dagiti agassawa, inimbitaran dagiti polis da Edgar Veramon ken Ronald Vitamog, agpada a kaarruba dagiti biktima, para iti clarificatory investigation ken naipakatan ni Veramon iti fingerprinting para iti pannakaikumpara kadagiti naala a lemma ti ramay iti crime scene.

Kabayatanna, naireport a kinamat dagiti polis ni Veramon gapu iti di panangitaltalek daytoy iti impasdekda a checkpoint ket idi makamatanda, naduktalanda nga adda iti babaen ti inpluensia ti arak.

Naiyisoan ni Veramon iti tiket gapu iti panaglabsingna iti trapiko.

Madama ti panagimbestiga dagiti polis mainaig iti nasao a panagtakaw.#

Comments are closed.