Footer

Empleado, dinungpar ti carnapper, natay

CAOAYAN, Ilocos Sur –  Dua a kaso ti sanguen daytoy a lalaki gapu iti panangitalawna iti maysa a kotse ken iti pannakadungparna iti maysa nga empleado ti gobierno idi malem ti Enero 28.

Naipila iti provincial prosecutor’s ofice iti Vigan City ti kaso a carnapping ken reckless imprudence resulting in homicide maikontra ken ni Jesus Follentes Jr. y Salazar, 32, baro, ken residente iti Barangay Angkileng, Sta. Lucia, Ilocos Sur.

Indeklara ti doktor a nangtaming kenkuana a dead on arrival iti Vigan Polyclinic Hospital ni Teodelio Salvador y Alconcel, 49, naasawaan ken residente iti Barangay Anonang Menor, ditoy met laeng nga ili gapu iti grabe a sugatna iti nadumaduma a paset ti bagina  kalpasan a dinungpar ti kotse a minaneho ti suspek iti sanguanan ti sementerio ti nadakamat a barangay.

Napakaskas ti panagpataray ni Follentes gapu ta linibasna nga intaray ti Toyota Corolla a kukua ni Bernard Arce y Quintong, 41, residente iti Barangay Don Alejandro, Caoayan, Ilocos Sur a nakaparking iti igid ti kalsada iti Barangay Don Lorenzo Querubin ditoy met laeng nga ili.

Segun iti report, nakita ni Reymund Arce y Dollete, anak ni Bernard, ti panangitalaw ni Follentes iti kotse ket dagusna nga impakaammo iti amana.

Sinakayan ni Arce ti motorsiklona ngem idi makadanon iti nakapasamakan ti aksidente, nabaliktaden ti kotsena iti maysa a bakante a solar kalpasan a nadungpar ti suspek ni Salvador.

Naammuan iti inbestigasion a saan a nagmenor ti suspek iti napakaskas a panagpatarayna iti baet nga adda barikada iti asideg ti police assistance center  ket nagresulta iti panangdungparna iti biktima a nairana a lumasat.

Naglak-am met ti sugat iti ulo ti suspek ket naitaray iti Vigan Polyclinic Hospital sa kalpasanna, naipan iti Caoayan Police Station para iti nainget a pannakapalutpotna.

Nakaro ti dadael ti kotse idinto a totally wrecked ti bisikleta.#

Comments are closed.