Footer

Kinaisnabera: negatibo nga ugali

Ni Ma. Theresa B. Santos

 

Isnabera. Wenno isnabero. Maysa a negatibo nga ugali nga immapon iti panunot a rumbeng la unay a liklikan wenno saan nga ikkan iti importansia. Saan a rumbeng a daytoy ti iseksek iti nalapad a muging ta amangan no inna pay alian ket agbalin la ket ngarud a nalidem ti taltaluntonen a dana ti biag. Awan ti maitulongna a pagimbagan daytoy. Awan ti maitedna a pagdur-asan ti biag.

Awan ti maitulongna ta arigna man tay agkubkublang a pintura ti diding. Saan a napintas a buyaen ta saanen a makaay-ayo no di ket makasuleken kadagiti mata. Iti ababa a pannao, addaan iti depekto iti bukodna a bagina ti asino man nga addaan itoy. Negatibo a gupit a mangiparangarang iti personalidad.

Nangato. Nalayog. Kasta ti pangiyarigan. Naim-imbag pay ti kawayan ngem ti isnabera. Ti isnabera, nalayog ngem awan ti serbina iti pagturonganna. Awan kaitutopan ti kinalayogna, ampaw. Saan a kas iti kawayan, nalayog man daytoy ngem nakadumog latta – nakadumog ti murdongna a mangiparangarang iti kinapakumbabana.

Ti kinapakumbaba ket aramid a naindaklan. Pasin-awenna ti kinatao. Pasidapenna ti personalidad.

Rumbeng laeng nga ikutan ti asinoman.

Dayta kinapakumbaba ti ugali ti kabaliktad ti maysa nga isnabera. Kas iti pakasaritaan ni Vera.

Agtutubo ni Vera. Napintas. Masirib iti eskuelaan. Adu ti mangdaydayaw kenkuana ngem saanna man laeng a subadan ti panangdayaw kenkuana; di man la umisem kas sungbatna iti kablaaw dagiti mangablaaw kenkuana. Iti ababa a pannao, wa epek kenkuana ti kablaaw dagiti addaan panggep a mangiyaraas iti banugbog ken kebbakebba ti barukongda agraman ti dardarepdepda iti kaltaang ti rabii wenno iti panagmulmulenglengda nga agmaymaysa. Saan a matukno ti kinalayog ti alipusposna.

Adda met dagiti napasugkian iti aramidna. Adda dagiti nasemsem ket nakaisawangda a mabalin kano a paghangeran iti linabaan a pantalon a maong ti subsob ni Vera no makablaawan. Isu a nasaysayaat laengen a saanda met a pansinen daytoy. Total, isu ti saan a pumansin, apay nga aramidenda pay laeng dayta a banag?

Nakadlaw ni Nana Caring nga inana kadayta nga ugali ti anakna. Binagbagaanna.

Ngem inrason ni Vera nga adu met dagiti gagayyemna kadagiti social networking sites, a kas iti Facebook, Tweeter, Google+ a nangiposteanna kadagiti ladawanna ken impormasion maipapan iti kinaasinona. Kadagitoy a social networking sites, maiyebkasna ti likes ken dislikesna. Saan a maum-uma a makibinbinnoltit, makibinbinnalatong ken no ania la ditan a kaetsingan ken awan kaitutopanna a saritaan. Adu dagiti pagayamna kadagiti social networking. Isu a naynay a nakauper iti sanguanan ti pink a laptop.

Ngem impalawag ti inana a sabali laeng ti gagayyem iti internet ken intimate relation. Iti internet, nupay gayyemmo a makuna ti tao ngem dimo am-ammo ti kinaasinona, saanka a makasigurado no pudno dayta, amangan no sabali ti pudpudno a naganna. Amangan no pati pay ti ladawanna ket saan nga isu no di ket pinidutna la no sadino ditan. Iti intimate a relasion, mariknam ti panagtalek ken kinaasideg iti rikna ken kinatalinaay agsipud ta am-ammom idan a mismo. Lalo dagiti kinasadaran ken kabaddungalam iti lugaryo. Saan met ketdi nga awanen ti bentahe ti pannakinetworking ta adda met dagiti pagsayaatan a mapidut nga adal ken susuro. Ngem saan koma a baybay-an ti intimate relation, ta kaipapananna ti pannakapukaw ti nasiksiken a relasion iti gimong wenno sosiedad.

Pinampanunot ken inamiris ni Vera dayta a palawag ti inana. Nautobna ti amin. Naikayakay ti pakakumikoman dagiti agtutubo iti lugarda. Ni saan man laeng a maimbitaran iti pasken wenno ummong dagiti agtutubo. Ni saan a mairaman ta saan met ngamin a makibiang wenno isu a mismo ket yad-adayona ti bagina.

Nangeddeng ngarud ni Vera. Masapul a balansienna ti pannakipagayamna iti internet ken iti intimate relation. Idi agangay, napasublina met laeng ti napukawna wenno naawan kenkuana. Nagbiag a rnaagsak ken natalinaay.

Isnabera. Kinaagmaymaysa ti kayat a sawen daytoy.  Ngem laglagipen koma nga awan ti agbiag nga agmaymaysa para iti bagina laeng. Madadael ti kinatao kadaytoy agsipud ta imbes nga ingatona, pababaenna ketdi ti personalidad.#

Comments are closed.