Footer

Maapektaran ti pagilian no agbayag unay ti impeachment trial ni Supreme Court Chief Justice Corona

Uray ni Impeachment Court  Presiding Judge Senate President Juan Ponce Enrile ket nakigtot idi impalgak ni lead counsel ti prosekusion Neil Tupas, Jr. a nasurok a sangagasut dagiti maayaban nga agtestigo iti sanguanan ti impeachment court a madama a mangus-usig ken ni Supreme Court Justice Renato Corona.

Segun iti listaan nga indatag ti prosekusion iti Senado nga agtugtugaw a kas impeachment court, 96 ti nakaiskediul nga agtestigo tapno paneknekanda a naglabsing ni Corona iti Konstitusion, panangliput iti panagtalek ti publiko ken panagkunniber ken korapsion. Karaman dagiti mapaayaban dagiti 11 a justices ti Korte Suprema, Court Administrator Jose Midas P. Marquez, Justice Secretary Leila M. de Lima, dagiti eksperto iti linteg, clerks of court, real estate developers, ken kamkameng ti media.

Iti met biang ti depensa, imbagada a mangipresentarda iti aganay 25 a testigo.

Kasapulan a rugosen ti prosekusion ti bilang dagiti ipresentarda a testigo tapno saan nga agbayag unay ti impeachment trial gapu iti posible nga epektona kadagiti umili ken iti pagilian.

Kas kapaliiwan, maysa wenno dua laeng a testigo ti maipresentar ti prosekusion iti impeachment court gapu kadagiti agsusupanget nga argumento ti prosekusion ken depensa ken iti agsasanggala a panangkontra ti naud-udi kadagiti maidatag a dokumento, ket abutenna la ketdi iti tawen sakbay a maiwakas ti impeachment trial. Apektaranna la ketdi ti panagtrabaho ti lehislatura. Mapempenanda la ketdi kadagiti gakat a tratarenda iti Kamara ken Senado tapno maipasada a linteg.

Kanunonganmi ti kinuna ni Sen. Miriam Santiago a saan koma a ti bilang dagiti saksi ti kitaen ti prosekutor no di ti kadagsen ti testimoniada a mangpabileg wenno mangpapigsa kadagiti akusasionda maikontra iti chief justice.

Isut gapuna nga agtutugaw koma dagiti kameng ti prosekusion tapno kitaenda a naimbag dagiti testigoda no adda met la maitulongda kadagiti walo nga articles of impeachment nga insaklangda iti Senado maikontra iti dadaulo ti Korte Suprema, kasta met a agsasangoda iti depensa para iti stipulasion kadagiti dokumento a maidatag iti korte babaen kadagitoy a testigo tapno nadardaras ti panaguyas ti panagusig. Rumbeng a maiwakas daytoy iti mabiit tapno ipamaysa metten dagiti agilinlintegtayo ti agputar kadagiti linteg a mangsolbar kadagiti nagkaadu a problema ti pagilian, nangruna iti ekonomia iti sanguanan ti maam-amak a panagpangato manen ti presio ti lana gapu kadagiti riribuk iti Nagtengnga a Daya.#

Comments are closed.