Footer

P100,000 gunggona makaited impormasion iti pannakasolbar pannakapapatay bise mayor

VIGAN CITY – Nangitanggaya ni Gov. Luis “Chavit” Singson iti P100,000 a gunggona iti siasino man a makaited iti impormasion para iti pannakatiliw dagiti pimmatay iti dati a bise mayor ti Sto. Domingo, Ilocos Sur.

Kinuna ni Police Senior Inspector Juan Abaya, hepe ti polis ti San Ildefonso, nga intanggaya daytoy ni Singson para iti madagdagus a pannakasolbar iti pannakapapatay ni dati a bise mayor Anthony “Tonyboy” Que y Purisima, 55, naasawaan, ken residente iti Barangay Vacunero, Sto. Domingo, Ilocos Sur idi rabii ti Enero 31 iti Barangay Poblacion West, San Ildefonso.

Awan pay ti nagparang a saksi iti nasao a pammapatay.

Segun iti inisial nga inbestigasion dagiti polis, madama nga agpatpatang ti biktima ken ni Arlene Tubon y Tubon, 26, taga-Barangay Napu, Sto. Domingo, Ilocos Sur, naasawaan, iti likudan ti Recel apartment iti Barangay Poblacion West, San Ildefonso idi pinaltogan dagiti di pay nabigbig a suspek a mapapati a nagpuesto iti alad a malikudan ti biktima ken ni Tubon.

Kanaig daytoy, nangbuangay ni Police Senior Supt. Noel Baguitan Amoyen, DSC, iti investigation team a binukel dagiti polis ti provincial police office a pakairamanan ti ISCIDT ken provincial crime laboratory, tapno mangiwayatda iti naing-inget nga inbestigasion mainaig iti pannakapapatay ti dati a bise mayor.

Dua ti anggulo a kitkitaen dagiti inbestigator: no adda pannakainaigna iti politika wenno love triangle ti pammapatay.

Mapapati a maysa a Filipino American ti asawa ni Tubon nga agnanaed iti Hawaii.

Intaray dagiti nagresponde a polis ni Que iti Metro Vigan Cooperative Hospital ngem indeklara ti nangtaming kenkuana a doktor a dead on arrival.

Nakarekobre dagiti inbestigador iti tallo a kapsula ti cal .45 ken 5 a kapsula ti cal .9mm iti nakapasamakan iti krimen.

Segun ken ni Abaya,  adda nakakita iti dua a tattao a nagnagna a napardas a  nagpalaud sada naglugan a naglibas. Nupay kasta, saan a nailasin dagitoy agraman ti numero ti naglugananda gapu ta nasipnget.

Kinuna ni Abaya nga agtultuloy ti panagimbestigada mainaig iti nasao a pammapatay idinto a dinawatna kadagiti nakasaksi iti krimen iti iruruarda a mangted iti impormasion para iti madagdagus a pannakasolbar ti kaso.

Nagkandidato ni Que a bise mayor ti Sto. Domingo, katiket ni dati a Congressman Mariano Tajon idi napalabas nga eleksion ngem naabak.#