Footer

P11.6M pategna a marihuana, napag-ot, napuoran

SUGPON, Ilocos Sur – Agpateg iti nasurok a P11,600,000 dagiti pinuon ti marihuana a pinarut ken pinuoran dagiti polis iti maysa a nasulinek a barangay daytoy nga ili idi Enero 29.

Nagtitipon dagiti elemento ti PAIDSOTG, ISPPSC ken PDEA Region 1 nga indauluan ni PSupt. Cornelio Paltoki Comila, PCI Sosimo R. Racho, PInsp. Apollo de Leon Calimlim, PO3 Darnel Libao Bacate ken PSO1 Edgar Libatique iti babaen ti superbision ni OIC, PSSupt. Noel Baguitan Amoyen a nangisayangkat iti panagraut iti nasao a plantasion a masarakan iti nagbeddengan ti Mt. Agay, Barangay Licungan, ditoy nga ili ken ti Mt. Litalit iti Sitio Batangan, Barangay Tacadang, Kibungan, Benguet.

Kalpasan ti panangpag-ot ken panangpuor dagiti polis kadagiti mula a marihuana a mapattpatta nga agpateg amin iti P11,680,000.00, nangisalogda iti sumagmamano a kareppet a naipan iti provincial police office iti Barangay Bulag, Bantay, Ilocos Sur kas pammaneknek iti operasion.#