Footer

Plantasion ti marihuana, nasukalan

NAGBUKEL, Ilocos Sur – Nasukalan dagiti polis ti maysa a plantasion ti marihuana bayat ti pursuit operation nga insayangkatda maikontra iti maysa a lalaki a masuspetsa a gumatang iti daytoy maiparparit a droga iti Barangay Cusocos ditoy nga ili idi agsapa ti Pebrero 1.

Nasukalan dagiti polis ti nasao a plantasion nga aglawa iti sumurok-kumurang a 16 metro kuadrado iti bakante a lote a napalawlawan kadagiti kaykayo iti kapanpantokan a paset ti nadakamat a barangay a nakaimulaan iti duapulo a fully grown a marihuana a mapattapatta nga agbalor iti P4,000.00.

Sakbay ti pannakasukal iti nasao a plantasion, nagturong dagiti polis iti Barangay Cusocos kalpasan a nakaawatda iti tawag iti selpon manipud ken ni Barangay Captain Ester Sape a nangipakaammo kadakuada nga adda kinamatda a dua a lalaki a suspetsoso ti tignayda ket natiliwda ti maysa a Lawrence Montero y Adona, 24, naasawaan, mannalon, ken residente iti Barangay San Antonio, Narvacan, Ilocos Sur.

Innaganan ni Montero ti kaduana a ni John Martinez y Delfin, 22, baro, mannalon ken residente met laeng iti Barangay San Antonio, Narvacan, Ilocos Sur.

Segun ken ni Montero, nagluganda ken ni Martinez iti Honda Bravo a motorsiklo iti ipapanda iti barangay tapno gumatangda iti marihuana ngem bayat ti panagur-urayda iti sango ti maysa a kalapaw iti panpantok iti asideg ti barangay road, sinitar ida ti maysa a di nabigbig a lalaki a nakalugan iti motorsiklo no ania ti kaaddada iti nasao a lugar.

Mapapati a naalarma dagiti dua ket nagtarayda iti nagsupadi a direksion ngem kinamat ida dagiti bumarangay a nakatiliwan ni Montero.

Nangisayangkat dagiti polis iti pursuit operation, kaduada dagiti kameng ti barangay council agraman ni Montero ket ditoy a nasukalanda ti nasao a plantasion.

Naipiskotda met ni Martinez iti Barangay Lapting, Nagbukel.

Pinarut dagiti barangay officials ken polis dagiti pinuon ti marihuana sada inkuyog dagiti dua iti police station para iti pannakaimbestigada.#

Comments are closed.