Footer

Security guard, natiliwan a nakasabbikel iti paltog

CANDON CITY – Dakkel a sakit ti ulo ti sangsanguen daytoy security guard kalpasan a natiliwan iti ikutna ti maysa a paltog iti checkpoint iti national highway a sakup daytoy siudad idi Enero 31.

Nasaklangan iti kaso a panaglabsing iti RA 8294 maikontra ken ni Joey Flores y Espierta, 32, baro, agnaed iti Vical, Sta. Lucia, Ilocos Sur ken agtrabtrabaho kas security guard ti MJKTV Videoke Bar iti Barangay Paras ditoy siudad.

Pinara dagiti polis ni Flores a nagmaneho iti motorsiklo a Bonus X iti impasdekda a checkpoint iti Barangay Oaig Daya ditoy siudad gapu iti kaawan ti plaka.

Nasukalan dagiti polis ti maysa a cal .38 revolver nga addaan iti lima a bala a nakasukbit iti siketna.

Nangiparang ni Flores iti ID a mangipakita a security guard manipud AFM Industrial and Watchman Protective Agency ngem saan met a nakauniporme ken awan ti naipakitana a permit to carry firearm outside residence (PTCFOR) isu nga impan dagiti polis iti police station.#

Comments are closed.