Footer

AGO BENDITO

NASAPA a sinakayan ni Itong ti tintinnaganna a motorna kadayta nga agsapa ti Huwebes. Dapon iti ilida ket masapul nga adu ti mapasadaanna. Mano laengen nga aldaw, agtinnag manen. Kurang pay ti naurnongna. Nagnginanto met ngaminen ti gasolina.

Saanna met ketdi a rigaten a ngumina ti gasolina. Ngem masapul koma met a maisurot ti pamasahe. Nailansan iti siete ti minimum a pamasahe. Ammona no apay nga awan kutkuti dagiti opisiales ti ili iti kiddawda a drayber. Asidegen ti eleksion ket narigat met no isu ti pakadadaelanda iti ambisionda a tumaray manen.

Anus, bagi, dikanto met nagpadi, kunkuna no kua ni Itong iti isipna. Ayna, no nagpadi la koma, a, ket manguarta koman ita ta sakbay ti eleksion. Reprep dagiti agboboda no kastoy a panawen. Aglayus ti kuarta dagiti papili. Kinnantiawan no agpetisionda. Pinnangato iti bitor!

Pagyamananna ketdi ta adda pay bassit dumket a masapulanna iti agmalem. Ti pagsayaatanna, saan a pakibibiangan da Tata Sabas ken Nana Ibiang a dadakkelna ti mapasadaanna.

“Dimo koma pagbisio ‘ta mateggedam,” sangkakuna ti amana no kasta nga agsasangoda a mangrabii. “Laglagipem ti rigrigat ‘diay adim nga agsapsapul ‘diay abrod.” Ni adingna a Daisy ti kinuna ti amana.

Ni Daisy ti nangted iti pag-down-na iti motor.

“Wen, Tatang, awan danag, napalawlawan,” sangkakunana met.

“Dimo tultuladen dagita padam a drayber,” litania met no kua ni nanangna. “Abusta awan la ngaruden ti masapsapulanda, ikarakrusda pay laeng.”

Pudno ti kuna ti inana. Naipakadawyanen kadagiti padana a drayber ti agkakarakrus no kasta nga awan ti mapasahero. Pagangayanna, adda dagiti agawid nga ima-ima.

“Kunak met, awan danag, ‘Nang, ta napalawlawan. Nasingpet ‘toy anakyo,” ipangasna met.

“Nasingpet kunam, loko, ket dim’ payen naturpos ti panagbasam. Kinaykayatmo ti nagbulakbol ngem ti nagbasa!”

Kudkodenna no kua ti di nagatel a teltelna. Pudno dayta. No apay met a nagpigsa la idin ti awis dagiti barkadana no kasta nga ayaban dagitoy nga agpansit ken agbiliar kadagiti kankanto iti siudad ti Tuguegarao.

“Naglabasen dagita, ‘Tang. Sabaliak itan,” kunaenna lattan.

Sabagay, pudno a di agsugsugal. Kayatna ti makaurnong tapno addanto aramatenna inton panggepnan ti agsimpa. Dua a kalgaw laengen, matnagen iti kalendario. No sungbatan la koma ni Ailene a sabong dagiti tagainepna, uray itan, kayatnan ti agsimpa. Narigat no lakay unayen santo mangsapul iti kapunganna. Ngem ania la unayen, ‘ya, ta di met laengen a sungbatan daytoy ti aglima tawenen nga idardariragna nga ayat.

Napigsa man a karibalna iti puso ti balasang ti kapurokanna a ni Mang Dexter. Addan asawa daytoy ngem armendo pay laeng. Agtrabtrabaho ni baketna idiay Singapore.

Ngem dina itulok nga abaken ti maysa a lumakayen. Ken addaan pay iti asawa! Dinan a nagan ti naganna nga Agolito no patapoken ti kas ken ni Mang Dexter iti puso ni Ailene!

NAGASATAK sa, nakuna ni Itong iti nakemna idi maysa a balasang ti damo a mapasaheruanna. Nalasinna ni Charm, ti anak ti kabarioanda, a mangparpara kenkuana idi makadanon iti nagbedngan ti barangayda nga Ammubuan ken ti Brgy. Sta. Cruz iti laud.

“Agpailika, Ading?” sinaludsodna apaman a naisardengna ti traysikelna.

“Wen, Manong,” impallilit ti balasang.

Napakanta la ket ngarud ti barukongna. Ngem apagapaman laeng idi malagipna ni Ailene. Wen, masapul a nadalus ti isipna, ti pusona, ti aminna nga isagutna ken ni Ailene.

“Umayka ngaruden.”

“Mabiit laeng, Manong, ta yurayta ni Mama.”

Isu met a rummuar nga agpayso ti mama ni Charm, ni Nana Inyang, iti inaladanda.

Makael-ellek ti uneg ni Itong a nakakita iti baket. Puraw a kumepkep a short ti suot daytoy a naasmangan iti nakalablabbasit nga sleeveless. Permi pay a puraw ti rupana ken nakalablabbasit dagiti bibigna.

Nagsakay dagiti agina. Ti rurodna ta immabay ketdin kenkuana ti baket idinto nga iti uneg ken ni Charm. Naipasabat la ket ngarud ti dina ammo no bangbanglo wenno bangbangsit nga impusitsit ti baket iti bagbagina.

“Ayna, naguapoka gayam, Lits,” kinuna kenkuana ni Nana Inyang idi agtartarayen ti traysikel.

“Saan met, Nana Inyang. Bassit…”

“Geny, plis…”

Nagbisin ket atoy a baketen, nakuna ni Itong iti nakemna. Agubing-ubing pay laeng ket madlaw met a baketen. Mano la a kalgawen, senior sitisenton. Agkakarenken payen ti mugingna.

(Adda tuloyna)