Footer

BANNER NEWS: 3 suspek iti panagtakaw, kinemmeg dagiti polis iti Vigan City

SAN VICENTE, Ilocos Sur – Ibilang dagiti polis ditoy a natukkolen ti duri ti grupo dagiti armado a lallaki nga agserserrek iti balay tapno takawanda kalpasan a natiliw iti Vigan City ti tallo a suspek a maatap a nainbolbar iti panagtakaw iti balay ti maysa a balikbayan ditoy nga ili idi Pebrero 7.

Tiniliw dagiti polis ti Vigan City da Silverio Madriaga y Pescador, 38, naasawaan, karpintero, residente iti Barangay Malingeb, Bantay, Ilocos Sur; Vicente Piano y Bautista, 42, baro, mannalon, residente iti Barangay Ora West, Bantay; ken ni Jomar Piano y Patron, 28, baro, residente met laeng iti Barangay Ora West kalpasan a nabigbig ida ni Trifonia Romano y Ruria, 65, balo, residente iti Sitio Ermita West, Barangay San Sebastian, San Vicente a karamanda iti grupo a simrek a nagtakaw iti balayna idi Pebrero 7.

Sinerrek ti lima nga armado a lallaki ti balay ni Romano iti agarup alas 3:00 ti bigat ti nadakamat a petsa babaen ti idadalanda iti akinlikud a tawa ti kusina. Pinaturongan dagiti mannanakaw iti paltog dagiti bumalay sada pinungo dagitoy ken innala dagiti aruatda nga alahas.

Simrek dagiti mannanakaw iti tallo a kuarto sada kinurimes dagiti napapateg a sanikua dagiti biktima a pakairamanan ti maysa a flat screen TV 32″ LG nga agpateg iti P42,000.00; 2 unit ti LG home theaters system nga agbalor iti P30,000.00;  maysa a laptop  Acer  nga agpateg iti P28,000; agduduma a lupot, sapsapatos, ken sandals nga agbalor amin iti P15,000.00; agduduma nga alahas nga agpateg amin iti sumurok kumurang a  P80,000.00; leather bag ‘Coach’ nga agpateg iti P20,000.00 a naglaon iti  United States issued Alien ID, State ID, Social Security System ID (SSS) ken  P2,000 pesos cash; 2 a selpon nga agbalor iti P15,000.00; ken 5 boxes ti  bangbanglo nga agpateg iti P10,000.00.

Mapapati a naglugan dagiti mannanakaw iti getaway vehicle a nalabbaga a nagturong iti abagatan a direksion iti panaglibasda.

Kabayatanna, naireport iti polis Santa ti pannakatakaw ti balay dagiti agassawa a Florencio Manzano y Basada, 74,  ken Pasencia Manzano y Borje, 74, agpada a pensionado ken residente iti Barangay Casiber, Santa, Ilocos Sur.

Naduktalan dagiti bumalay ti panagtakaw idi agarup 4:00 ti malem ti Pebrero 7 a pannakakitada a nakalukat dagiti kabinet ken naiwarawara dagiti aruatenda iti suelo.

Segun dagiti biktima, kinasakas dagiti di nabigbig a mannanakaw ti bag a naglaon iti sumurok kumurang a P30,000.00, maysa a balitok a kuentas nga agbalor iti $1,000, singsing nga agbalor iti $1,000.

Iti panagimbestiga dagiti polis, nakastrek dagiti mannanakaw iti balay babaen ti pananglukatda iti aluminum a de-sarming a tawa iti akinlaud a paset ti balay dagiti biktima.

Nagsasaruno dagiti naireport a panagtakaw ditoy probinsia idi Enero ken umuna a lawas daytoy a bulan.

Idi Enero 13, sinerrek dagiti armado a mannanakaw ti balay ti maysa a retirado a mangisursuro sadiay Barangay Imus, Santiago, Ilocos Sur, pinungoda dagiti bumalay sada intaray ti 400 Euro nga agbalor iti P30,000, assorted nga alahas nga agpateg iti P100,000, Sony Ipod, laptop, 6 a selpon, ID ken tultulbek.

Natakawan met ti balay ti maysa a balikbayan idiay Barangay Paing idi Enero 14 ket kinasakasda dagiti cash money nga agdagup iti P145,000; 660 pounds, assorted nga alahas ken napapateg a sanikua nga agbalor amin iti P207,500.00.

Idi Enero 29, sinerrek dagiti mannanakaw ti balay ti agassawa nga abogado sadiay Barangay Parada, Sto. Domingo, Ilocos Sur ket kinurimesda ti maysa a laptop, Olympus camera, P20,000,00 cash, lisensiado a cal 9 mm pistol nga agpateg iti P45,000.00 ken ti kuarta ti abogada a P5,000.00 ken dadduma pay a personal a belongings.

Kanaig daytoy, imbilin ni Provincial Director Senior Supt. Noel Baguitan Amoyen kadagiti hepe ti polis ti naing-inget pay a panagtsekpointda ken panangisayangkatda iti police integrated patrol system tapno malapdan dagiti panagtakaw iti lugar a responsibilidadda.#

Comments are closed.