Footer

Biahe ti eroplano, agtultuloy

VIGAN CITY – Agtalinaed nga adda biahe iti Vigan Airport kalpasan a sinublat ti maysa nga airline ti biahe ti SouthEast Asian Airlines a Manila-Vigan-Manila.

Kinuna ni Gov. Luis “Chavit” Singson nga agrubbuat ti Lion’s Air a kas met laeng iti sigud iti alas dos ti malem sadiay Manila nga agpa-Vigan ken agsubli met la daytoy iti Manila iti alas kuatro ti malem.

Innayon ti gobernador a tunggal Biernes ken Domingo ti aldaw ti biahe ti nadakamat nga eroplano.

Mainaig iti daytoy, bimmisita itay laeng nabiit dagiti Singaporean investors nga interesado nga agipuonan iti panagbiahe ti eroplano tapno kitaenda dagiti mabalin  a simpaenda tapno sumayaat ti pasilidad ti Vigan Airport.

Karaman ditoy ti pannakayatiddog ti runway ti eropuerto ken ti pannakapasilaw daytoy tapno mabalin a sumanglad dagiti eroplano uray iti rabii.#