Footer

Lalaki, napaltogan bayat ti panaginomda

VIGAN CITY – Nakasuan iti city prosecutor’s office ti suspek a pimmaltog iti kalugaranna iti Barangay Bulala ditoy siudad idi Pebrero 6.

Nakasuan iti murder ni Carlito Madriaga y Marantan, 33, naasawaan, taga-Barangay Subec, Sta. Catalina, Ilocos Sur ngem agdama nga agnaed iti Barangay Bulala Centro, gapu iti panangpaltogna ken ni Alberto Areola y Patao, 46, balo, native ti Cagayan ngem agnaeden iti met laeng nadakamat a barangay.

(Flash report – Maysa a konsehal ti naireport a napaltogan idi agarup 10:20 ti bigat ti Pebrero 9 iti uneg ti balay ti maysa a gayyemna idiay Barangay Bimmala, Tagudin, Ilocos Sur

Naideklara nga awanen ti biag ni Tagudin Sangguniang Bayan Member Rodrigo Lorena, 64, idi maidanon iti Tagudin Comprehensive General Hospital.

Iti inisial nga inbestigasion dagiti polis, mapapati a napaltogan ni Lorena ti bukodna a bagi iti uneg ti pagtaengan ti maysa nga agnagan iti Danilo Lanoza.

Segun ken ni Lanoza, napan ti konsehal iti balayna tapno agdamag mainaig iti cal. 45 agsipud ta adda panggepna a gumatang iti kastoy klasena a paltog.

Mapapati a pinanawan ni Lanoza ti konsehal a mangsuksukimat iti paltogna a cal. 45 tapno mapanna padigosen ti anakna ket bayat ti kaaddana iti banio, nakangeg laengen iti kanalbuong. Idi mapanna kitaen ti biktima, nakadasayen daytoy ken daradara.

Madama ti panagimbestiga dagiti polis no aksidente wenno adda foul play iti pannakapaltog ti konsehal.

Naipakatan metten iti paraffin test ti biktima ken ni Lanoza tapno makita no positiboda iti pulbora.)

Iti report manipud iti polis ditoy, agin-inom ti biktima ken ni Nilo Ped y Silos, 37, naasawaan, tricycle driver, iti agarup 8:20 ti rabii ti nasao a petsa iti 4 J’s Store ket inyawis ni Ped ti panaginomda iti suspek nga adda mapanna gatangen iti tienda.

Mapapati a nagkitakit ti suspek, nagsanud sa kellaat a pinalikudanna a pinaltogan ti ulo ni Madriaga.

Naitaray ni Madriaga iti Gabriela Silang General Hospital ngem pimmusay bayat iti pannakatamingna.

Nangiwayat dagiti polis iti pursuit operation iti suspek iti Barangay Subec, Sta. Catalina ket narekobreda ti traysikel a nagluganan ti suspek iti panaglibasna ngem saandan a nasapulan daytoy.#

Comments are closed.