Footer

Naing-inget nga integrated police patrol system

Nagsasaruno dagiti naisayangkat a panagtakaw ditoy probinsia iti immuna a dua a bulan daytoy a tawen. Taldiapantayo dagiti sumaganad:

Idi Enero 13, sinerrek dagiti armado a lallaki ti maysa a balay iti Barangay Imus, Santiago, Ilocos Sur ket intarayda dagiti kuarta ken sanikua nga agbalor iti agarup P150,000.00.

Idi Enero 14, tinakawan dagiti armado a lallaki ti maysa a balay iti Barangay Paing, Bantay, Ilocos Sur ket kinasakasda dagiti kuarta nga agdagup iti P145,000, 660 pounds nga agbalor iti aganay P45,000.00, alahas ken napapateg a sanikua nga agbalor amin iti P207,500.00.

Idi Enero 29, natakawan ti balay ti agassawa nga abogado sadiay Barangay Parada, Sto. Domingo, Ilocos Sur. Mapattapatta nga aganay a P100,000.00 ti pateg ti pistol, kamera, laptop agraman ti P5,000 cash nga intaray dagiti mannanakaw.

Iti umuna a lawas ti Pebrero, natakawan ti maysa a balikbayan ket kinasakas dagiti armado a lallaki ti flat screen TV 32”, LG home theaters system, laptop, luplupot, sapsapatos, sandals, agduduma nga alahas ken kuarta a mapattapatta nga agdagup iti sumurok kumurang P250,000.00.

Sabali manen a panagtakaw ti naisayangkat iti Barangay Casiber, Santa a nangitarayan dagiti mannanakaw iti kuarta a P30,000.00 ken kuentas ken singsing nga agbalor iti nasurok a P80,000.00.

Ket itay Pebrero 8, natakawan ti maysa a dati a sangguniang bayan member ket karaman dagiti nakurimes iti balayna ti maysa a flat screen TV nga agbalor iti P25,000.00, Rado watch nga agpateg iti $350, lisensiado nga Smith and Wesson 357, P57,000.00 cash, 2 a military medals, bullet proof vest ken alahas nga agpateg iti P5,000.00.

Ania ti kayat a sawen dagitoy?

Umuna, natured unayen dagiti mannanakaw, awanen ti panangipirpiritda kadagiti polis.

Maikadua, saan a nainget ti panagtsekpoint ken panagpatrolia dagiti polis, barangay officials ken barangay tanod iti lugar a masakupanda.

Maikatlo, adu pay la dagiti armas nga adda iti ikut dagiti tattao, nangruna kadagiti managdakdakes ket dagitoy timaar-aramat iti maisayangkat a krimen.

Kasapulan nga iying-inget ti kapolisan ti panangipakatda iti integrated police patrol system ken agiwayatda kadagiti checkpoint kadagiti rummuaran ken sumrekan iti probinsia, ili wenno siudad. Saan laeng koma nga iti sanguanan ti munisipio wenno police station ta kapaliiwan a saan nga epektibo daytoy a panangmonitor kadagiti agisayangkat iti krimen, kas iti panagtakaw.#

Comments are closed.