Footer

Polis, timmungpa, nagkariar

STA. MARIA, Ilocos Sur – Dakkel a sakit ti ulo ti sanguen daytoy a polis agsipud ta kayat nga idarum dagiti uppat a kalugaranna a dinangran ken pinangtaanna.

Saan nga immannugot da Junel Basconcillo y Ayson, 18, baro; Chester John Della y Corrales, 17; Heaven Alcantara y Aglibut, 15; ken Levie Dano y Datul, 20, agpapada a residente iti Barangay Nalvo, ditoy nga ili, ti makiareglo ken ni PO1 Noel Cariaga bayat ti naisayangkat a panagpapatangda iti police station idi Pebrero 6.

Segun iti report manipud iti polis, agtugtugaw da Basconcillo, Della, ken Alcantara iti sanguanan ti balay ti naudi iti pasado alas 8:00 ti sardam idi Pebrero 4, idi simmangpet ni Cariaga ket dinamagna ti ayan ni Jessie James Domingo.

Mapapati a sinipat ni Cariaga ti muging da Alcantara ken Della sana tinumeng ken tinungpa ni Basconcillo idi insungbatda a dida ammo ti yan ti birbiroken ti polis.

Idi simmangpet ni Dano, inasitgan ti polis sana imbalikas ti “Sika ti aginpapasaw ditoy?” a sinungbatan ni Dano iti “Saan, Manong”.

Pinaguray ti polis dagiti uppat sa pimmanaw ngem dinagdagus dagitoy ti naglemmeng iti inaladan ti maysa a Jerick Dumot.

Nagsubli ti polis nga addan iggemna a long firearm idinto nga agririaw iti “Rummuar ti malalaki ditoy abagatan”.

Mapapati nga adda iti inpluensia ti arak ti polis idi nagkariar.#

Comments are closed.