Footer

Sabong Ti Lawag (Maudi a paset)

IV.

 

GROSERIAM daytoyen, Vivian?

Sosio, Maribel.

Asino?

Ni Cris. Ti ibagbagak kenka idi a kustomerko. Ngamin, kunana, nasaysayaat laengen nga agbalinka a tindera ngem ti lamolamo a mannala.

Ha-ha! Inggarahenakan?

Saan!

Ow? Hanabale, nakakalika iti balitok. Kasta koma met kaniak. Ngem, agurayka amangan no agayat kenka?

Diak ammo.

Sika nay?

Nabayagen a natnag ti riknak kenkuana. Ita laeng a makariknaak iti kastoy. Maysaak met gayam a tao, Maribel, saan nga abalbalay dagiti bagiw iti estero a lubong.

Wow, ha? Pati dialogom, nagbaliw! Inlabkan a talaga!

Uray siak, diak patien!

 

V.

 

AGLULUAKA, Vivian. Is-isemannakan ti agmurmuray a baybay.

L-lua ni ragsak, Cris. Itay rummuarta iti simbaan, nariknak ti pannakadigos ti kararuak. Naipasngayak manen!

Maragsakanak unay a makangngeg iti dayta, Vivian.

Gapu kenka, Cris.

Makitkitakon ti raniag dagita matam a kadindinnaeg ti agtangkayag nga Apo Init. Addaan biag, silaw ken kaipapanan ti nasam-it nga isemmo. Iti  tallo pulgada a takon ti sapatosmo, pimmataskan kaniak iti tayagko a lima kadapan ken walo a pulgada.

Utangko kenka, Cris.

Sapay koma ta ikankanayonmon ti panagbalbaliwmo.

C-Cris…

V-Vivian…?  Ania ti kaipapanan ti napigket la unay a perrengmo?

Cris, ay-ayatenka. Diakon magawidan pay ‘toy riknak…oh!

Saan nga umno daytoy, Vivian. Dika koma umarakup.

Ay-ayatenka, Cris. Ita laeng nga agayatak ken adda mangipateg kaniak. No mapukawka iti biagko, ipatayko la ketdi.

Masapul a  kontrolem dayta bagim, Vivian. Rumuk-atka pangaasim. Kasta…!

Cris…?

Maiyaw-awan ti tao a dina makontrol ti bagina. Nasken a nalawlawa ti pannakaawat ken panagimutektekmo tapno naannayas ti panagbiagmo.

Dinak mapabasol ta pudno nga ay-ayatenka, Cris.

Saanka a mabalin nga ayaten, Vivian. Addan asawak ken tallo nga annako!

S-saan a pudno dayta!

Nainkabsatan laeng ti riknak kenka.

Dinak koma angawen iti kasta, Cris, pangaasim. M-matayak la ketdi no mapukawka…

Ngem pudno ti sasawek…

 

VI.

 

KAPAMINLIMAN a gundaway daytoy a kayatka a kasarita, Vivian. Kunak no paayennak manen iti yuumayko ditoy apartmentyo.

C-Cris…

No dinakton kayat a kasao kalpasan daytoy, okey laeng. Dikanto metten riribuken pay. Ibilangkonto laengen a pannakapaay iti maysa a karit ti napasamak. Ngem sigurado nga aramidekto manen daytoy iti sabali. No ti bukel ti lawag nga immulak ket saan a nagtubo gapu iti saan a kinasayaat ti daga, mangimulaakto manen iti sabali pay a bukel iti sabali a daga.

C-Cris…

Vivian, okey laeng no guraennak ta nalaklaka ngata a malipatannak no kasta. Ngem apay a nagsublika iti bar?

K-kayatko ti manglipat. Ay-ayatenka unay unay. Dimo kadi maawatan?

Uray no agsublika iti panagbasol?

Diak a kabaelan nga awaten ti pannakapaayko. Insuronak kadi nga agayat tapno aglidayak laeng?

Insuroka nga agayat tapno dayta koma nga ayat ti isaknapmo ditoy lubong. Bay-am koma nga aginakbay ‘ta banglom ken dayta pintasmo a kas intrumento ti ayat ti Dios.

A-ania ti kayatmo a sawen?

Ladingitek, Vivian. Ngem no napaayka, mas pay kaniak. Ta ti bukel ti lawag nga intukitko iti kinataom, nagtubo ngem saan sa a rumangpaya ken agsabong. Anansata, dumteng iti biag ti tao ti batibat, ngem mabalintayo met ti agriing a mangsango a situtured kadagiti karit iti biag…

Cris?

Managbasolak met idi. Sangapulo ket dua pay laeng ti edadko, inabusodakon dagiti bakla ken pedopilia. Kas kenka, nagsalsalaak met a lamolamo. Nagbalinak a pamedped dagiti mabisbisinan iti lasag. Kas kenka, nasukansukat met ti kaatagko iti agpatnag.

A-agpadata iti sinagaba iti biag?

Kas kenka, tinulongannak met ti maysa a natay ngem nagungar.

Natay ngem nagungar?

Ti managbasol a nagbalin a nalinteg…

Cris?

Tinawen nga aramidek daytoy. Uray dagiti padak a nagungar a mangilinlinteg kadagiti mangtaltalunton iti kinakillo a biag. Maysa a sapata. Kastoy koma met ti kiddawekto nga aramidem a kas kasukat ti inaramidko. Ti salsaludsodem idi a sukat ti panangtulongko kenka. Ta manipud kenka, dumtengto ti adu a panagbalbaliw dagiti managbasol agingga a mapno manen ‘toy lubong iti ayat. Sika koma ti Sabong ti Lawag.

C-Cris!#