Footer

Selebrasion ti kasangay, nagtungpal iti trahedia

CANDON CITY – Nagtungpal iti trahedia ti panangselebrar dagiti agbabarkada iti panagkasangay ti kaklaseanda idi nalmes ti dua a pakairamanan ti nagkasangay bayat ti panagdidigosda iti baybay ti Barangay Darapidap ditoy siudad idi malem ti Pebrero 6.

Naideklara nga awanen ti biagda iti ospital a nakaitarayanda da Sheila Verga y Rafael, 14, 2nd year high school ken residente iti Barangay Mckinley, Galimuyod, Ilocos Sur ken Lorrie Ann Pranada y Martinez, 14, 2nd year high school, ken residente iti Barangay San Agustin, Candon City.

Naammuan iti inbestigasion dagiti polis a naglangan iti klaseda dagiti biktima agraman ti uppat pay a kaklaseanda a babbai iti Candon National High School ket nagturongda iti Darapidap Beach Resort iti agarup 9:00 ti bigat iti nasao a petsa tapno selebraranda ti panagkasangay ni Sheila.

Mapapati a gimmatang iti arak ken soft drinks dagiti estudiante iti ruar ti beach resort.

Idi agarup 3:30 ti malem, nagdidigos dagiti estudiante ket mapapati a ginuyod ti koriente dagiti dua a biktima a puon ti nakalmesanda.

Kabayatanna, maysa a lalaki ti naireport a nalmes kalpasan a naiyanud iti napigsa nga agus iti irigasion canal iti Barangay Naguiddayan, Bantay, Ilocos Sur idi agarup 6:30 ti malem iti Pebrero 7.

Segun ken ni Nemita Daser y Pido, 57, naasawaan, ken residente iti nadakamat a barangay, nakitana ti biktima  nga iyan-anud ti agus sumagmamano a metro sakbay ti ngiwat ti irrigation tunnel ket dagus nga impakaammona ti napasamak.

Iti panagimbestiga dagiti nagresponde a polis, naammuan a napan simmareb iti danum ti biktima a nainaganan Mario Paranada y Peru, 42, naasawaan, iti irrigation canal ngem naikaglis ket nanabsuok iti danum ken naiyanud.

Nasarakan ti biktima iti ballasiw ti tunnel nga awanen ti biagna.#