Footer

Tricycle driver, nanabtuog iti buy-bust operation

VIGAN CITY – Inaresto dagiti polis ti maysa a tricycle driver a masuspetsa a drug pusher kalpasan ti insayangkatda a buy bust operation iti Barangay Bulala ditoy siudad idi malem ti Pebrero 8.

Natnag iti buy-bust operation ti suspek a ni Wilfredo Camacho Faypon, 33, baro, agpaspasada iti traysikel ken residente iti Barangay Ayusan Norte ditoy Vigan.

Nagtitipon dagiti elemento ti PAIDSOTG, Ilocos Sur PPO, PIB nga indauluan ni PCI Sosimo Racho ken  PI Beverly Galsi Magastino, ISPPSC nga indauluan ni PI Juex Urbano ken Vigan City police station babaen ti direkta a superbision ni PCI Ernesto Pardo Navarro, Jr., OIC, a nangpalab-og ken ni Camacho a nagresulta iti pannakakumpiska kenkuana ti dua a sag-P1,000.00 a marked money, 3 a heat sealed plastic sachet a mapapati a naglaon iti shabu nga agdagsen iti .1 gram, maysa a selpon, maysa a bassit nga asul a bag a naglaon iti cash money a P6,495.00 a mapapati a naglakuan iti illegal a drog ken assorted a dokumento.

Sakbayna, nagpammarang a poseur-buyer da SPO1 Benjamin Ajel, kameng ti PAIDSOTG, ken SPO1 Gerardo Navarro ket gimmatangda iti mapapati a lako a shabu ni Camacho bayat a nakalugan daytoy iti Honda TMX tricycle.

Apaman a nalakuan dagiti nagpammarang a buyer, dinagdagus dagiti polis a nakakawes iti sibilian a nakalemmeng iti asideg ti nakapasamakan ti transaksion nga inaresto ti suspek.

Naipan ti suspek agraman dagiti nakumpiska kenkuana iti police station para iti umisu a dokumentasion.

Sakbayna, nagpositibo ti panagsukisok dagiti met la nasao a grupo iti pagtaengan ni Fernando Sajonia, 31, baro, ken residente iti Barangay Ayusan Norte ditoy siudad.

Nakakumpiska dagiti polis iti uppat a long strips foil, 7 a crumpled foil, 2 nga improvised glass totter, 2 nga improvised foil totter, 3 disposable lighter, maysa nga awan naggianna a healed sealed plastic sachet, maysa a nangisit a pouch a naglaon iti mapapati a napagango a bulong ti marihuana, 51 nga awan naggianna a transparente a sachet, maysa a homemade cal. 38 nga addan iti dua a bala iti cylinderna, ken maysa a bala para iti nasao met laeng a paltog.

Naiwayat ti panagsukisok babaen ti panangimatang dagiti barangay officials.

Iggem dagiti nagsukisok ti Search Warrants No. 10, 11, ken 12 nga inyisio ni Judge Francisco A. Ante, Jr. MTCC, Vigan City para iti tallo a pagtaengan idi napanda nagsukisok iti nadakamat a barangay ngem ti laeng balay ni Sajonia ti nagpositibo.

Negatibo ti resulta iti panagsukisok iti balay a sinaklaw iti SW No. 10 idinto a saan a naiwayat ti SW No. 11 gapu iti problema ti family name.#  

Comments are closed.