Footer

Wanted person, naisuko iti polis

TAGUDIN, Ilocos Sur – Insuko ti maysa nga opisial ti barangay ti kabagianna a dati a PNP member a sumangsango iti tallo a kaso iti korte ditoy nga ili idi malem ti Pebrero 6.

Kinuyog ni Barangay Kagawad Lolita Linda Lazaga ni Voltaire Linda Castro, 41, naasawaan, dati a polis ken residente iti Barangay Rizal ditoy nga ili a simmuko iti polis.

Adda tallo a warrant of arrest nga inyisio ni Judge Modesto L. Quismorio, Jr., ti Regional Trial Court Branch 25, ditoy nga ili idi Oktubre 17, 2011 gapu iti panaglabsing ti akusado iti RA 9165 wenno Comprehensive Dangerous Drugs Act of 2002, a nai-docket iti babaen ti CC No. 1155-T nga addaan iti piansa a P60,000.00; 1156-T nga addaan iti piansa a P200,000.00 ken 1157-T nga awanan piansana.

Naipan ti akusado iti BJMP Tagudin idi Pebrero 7, kas panagtungpal iti commitment order a pinirmaan ni Judge Quismorio iti daytoy met laeng a petsa.#