Footer

2 nagaboran a treasure hunter, bangkaydan a naiyaon

TAGUDIN, Ilocos Sur – Kalpasan ti sumagmamano nga aldaw manipud nagaburanda a sibibiag, naiyaon met laengen ti bangkay dagiti dua a lalaki a mapapati nga agkalkali iti gameng iti lakon ti maysa a bise mayor ditoy nga ili.

Immuna a naiyaon ti bangkay ni Jerry Leal, 40, naasawaan, ken residente iti Barangay Lacong, ditoy nga ili idi rabii ti Pebrero 16, sa simmaruno ti bangkay ni Eliazar Valiaron, naasawaan ken residente iti Subic, Zambales idi agarup 3:30 ti Pebrero 17.

Nagaburan a sibibiag da Leal ken Valiaron idi narsuod ti pannakadiding ti aganay 30 metro lti kauneg nga abut a kalkalienda maigapu iti mapapati a panagginginedna idi agarup 9:20 ti bigat ti Pebrero 14.

Sa laeng naireport ti nasao nga insidente iti polis ditoy idi agarup alas 7:00 ti rabii kalpasan a saan a nabaelan dagiti kakadua dagiti nagkali nga inwalin dagiti daga a naigabor kadagiti biktima.

Iti pannakiuman kenkuana ti DWRS babaen ken ni anchorman Jun Ramos iti programa daytoy a Barangay Commando Brigada, inannugot ni Vice Mayor Rogelio Lorenzana a saanda a naireport a dagus ti napasamak gapu ta naseknanda iti pannakaiyaon dagiti biktima a nagaburan iti daga. Uray dagiti barangay officials ti Lacong, nababalawda met gapu iti saanda a panangireport a dagus iti polis iti insidente.

Mapapati nga adda pammalubos ti bise mayor iti panagkali ti grupo iti mapapati a gameng iti lakonna iti baet nga awan ti pammalubos manipud kadagiti maseknan nga ahensia ti turay.

Kanaig daytoy, kinuna ni Mayor ti Tagudin Roque “Jun” Verzosa a mangipaay ti gobierno munisipal iti pinansial a tulong kadagiti biktima.

Kinunana pay a tumulong ti LGU ti Tagudin para iti pannakaiyawid ti bangkay ni Valiaron iti Subic, Zambales.

Segun iti mayor apaman a dimmanon kenkuana ti report mainaig iti pannakagabor dagiti biktima, pinagtignayna a dagus ti Municipal Disaster Risk Reduction Management Council ket nakikoordinar daytoy iti Office of Civil Defense, Mines and Geoscience Bureau ken personnel ti HOLCIM Company a nagpatulongan ti MGB.

Simmangpet met dagiti personnel ti Ilocos Sur PPO ken ti Regional Public Safety Management Batallion (RPSMB), 2nd Maneuver Company iti Bio, Tagudin tapno tumulongda iti panangkontrol kadagiti tattao.

Immarayat pay ti Philex Mining Company babaen ti panangipatulodna iti dua a minero a timmulong iti rescue retrieval dagiti nagaboran.

Babaen ti buck hoe, nagkali dagiti rescuers iti abut iti abay ti narba a bubon sada tinukolan ti daga a kumamang iti nakagaboran dagiti biktima.

Naiyaon ti bangkay ni Leal idi agarup 11:40 ti rabii ti Pebrero 16.

Naisardeng ti retrieval operation iti 11:45 iti dayta met la a rabii sa naituloy iti kabigatanna. Naiyaon dagiti rescuers ti bangkay ni Valiaron idi agarup 3:30.

Kinuna ni Engr. Roel Collado, OIC ti Mines Management Division ti Mines and Geosciences Bureau ti Department of Environment and Natural Resources a mangiwayat ti opisinana iti panagimbestiga mainaig iti mapapati a panagkali iti gameng iti lakon ni Lorenzana tapno duktalenda no asino dagiti agsungbat iti napasamak.

Segun met iti regional director ti MGB-DENR, nga adda panaglabsing iti paglintegan agsipud ta awan ti pammalubos ti grupo nga agkali iti gameng.

Mapapati a naglibas ti tao a mapapati a nakikontrata iti bise mayor nga agkali ti gameng idi nagaburan a sibibiag da Leal ken Valiaron.#