Footer

Itan, saan nga intono kua

Dakkel a pagdidiskusionan iti impeachment trial ni Supreme Court Chief Justice Renato Corona dagiti naibutaktak a bank accounts ti dadaulo a mahistrado.

Kas maibatay iti rekord ti PSB, adda kadagupan a bank balance a P19,728,555.39 iti dua laeng a peso accounts ni Corona agingga iti panagtapos ti December 2010.

Iti napilpilit a panagtestigo ti presidente ti bangko, napudasdasan nga iti maysa a peso account (089-121019593) a naluktan idi 2009, addaan iti balanse a P8.9 million idi Disiembre 31, 2009. Dimmakkel ti balanse iti nasao nga account iti P12,580,316.56 idi aggibus ti tawen 2010.

Sabali pay a bank account (089-121021681 a naluktan laeng idi 2010 ti addaan iti balanse a P7,148,238.83 idi aggibus iti dayta met laeng a tawen.

Adda pay bank account a naluktan idi Disiembre 2009 ngem naserraan met laeng iti dayta a bulan kasta met ti tallo nga accounts a nairuar amin a naggianna idi Disiembre 11, 2011, maysa nga aldaw sakbay ti pannaka-impeach ni Corona iti House of Representatives.

Kas indeklara ni Corona iti Statement of Assets and Liabilities and Net Worthna (SALN) , addaan laeng iti P2.5 million a cash ken investments para iti 2009 ken P3.5 million a cash ken investments para iti 2010, nababbaba nga amang ngem dagiti nasukalan a peso accountsna iti PSB.

Nupay kuna ti Depensa a salsalaknibanda laeng ti kalintegan ti dadaulo a mahistrado kas intuding ti Bank Secrecy Law, nakadidillaw ti panagpaarayatda iti Korte Suprema ken ti panangipila ni Corona iti petision a mangpasardeng iti impeachment court iti panangdengngegna iti trial. Ket nupay nagballigi ti Depensa ken ti PSB a nakaala iti temporary restraining order manipud iti Korte Suprema a nanglapped iti impeachment court a mangsukimat kadagiti dollar accounts ti chief magistrate, saanen a mapaglikudan pay ti kaadda dagitoy nga accounts iti nasao a bangko ket narigatda a maipalawag dagitoy kadagiti umili a mangsursurot iti trial.

Kinuna dagiti abogado ni Corona nga imbatad ti chief magistrate a paluktanna dagiti dollar accountsna kadagiti nasao a bangko iti maikanatad a tiempo.

Ulitenmi ti saludsod ni Presidente Benigno Aquino: apay a dina pay la ibilin ti pannakalukat dagiti nasao a depositona tapno makita dagiti umili nga awan ti ilemlemmengna? Kabayatan ti panawen a saan nga ipalubos ni Corona ti pannakalukat dagitoy ket agtaktakder iti pandiling ti TRO ti Korte Suprema, ad-adda laeng a bumileg dagiti atap nga agpayso nga adda karga dagiti dollar accounts a dina kayat a maibutaktak iti publiko.#

Comments are closed.