Footer

Mulmula a marihuana, pinarut dagiti polis

MAGSINGAL, Ilocos Sur – Limapulo ket uppat a pinuon ti marihuana ti pinarut dagiti polis iti kabakiran a paset ti Mount Bantay, Barangay Patong ditoy nga ili idi agsapa ti Pebrero 13.

Nagturong iti nadakamat a lugar dagiti nagtitipon nga elemento ti PAIDSOTG ti Ilocos Sur Provincial Police Office nga indauluan ni PCI Sosimo Racho ken dagiti polis ditoy nga ili nga indauluan ni PSI Andrew Rabang babaen ti direkta a superbision ni PSI Roy Rafanan kalpasan a nakaawatda iti impormasion manipud iti maysa nga asset iti kaadda dagiti mula a marihuana a matartaripato sadiay.

Nabigbig ti caretaker ti nasao a lote a maysa a Modesto Tolentino. Nupay kasta, saan a nasarakan dagiti polis daytoy bayat ti operasion.

Sinaksian dagiti barangay officials ti nasao a lugar ken kameng ti media ti pannakaparut dagiti mula sakbay a naipanda iti Magsingal police station ken naipaima iti PNP Crime Laboratory Office ti Ilocos Sur PPO.#