Footer

Produkto ti probinsia, masimpa ti pannakapaketena

Ni Mancielito S. Tacadena

 

VIGAN CITY – Tallo nga industrial design specialists manipud iti Manila ti nangidaulo iti pannakapasayaat ti disenio ken label dagiti nadumaduma a produkto iti Ilocos Sur bayat ti tallo nga aldaw a konsultasion a naangay manipud Pebrero 15-17.

Immuna a naangay ti konsultasion para kadagiti ili iti maikadua a distrito sadiay siudad ti Candon idi Pebrero 15. Naangay met ti konsultasion para iti maikadua a distrito iti siudad ti Vigan idi Pebrero 16 sa iti met la siudad ti Candon idi Pebrero 17 para kadagiti upland municipalities.

Segun ken ni Ma. Julia  Amigable, provincial consultant ti Buy Ilocos Sur Made Product, katinnulong ti gobierno probinsial dagiti ahensia ti Department of Trade and Industry (DTI), Technical Education and Skills Development Authority (TESDA), Department of Labor and Employment (DoLE),  Department of Science and Technology (DoST), Department of Agrarian Reform (DAR) ken Department of Agriculture.

Innayon ni Amigable a maysa daytoy a wagas tapno lalo pay a maikkan iti gundaway a makikompetensia dagiti produkto ti Ilocos Sur kadagiti produkto ita iti merkado.

“Mangtedda iti suhestion tapno maddaan iti napintas a packaging ken labelling dagiti produkto ken maaddaan iti baro a disenio dagiti aramid kas iti labba, bigao, abel iluko ken dadduma pay a produkto ditoy,” inlawlawag ni Amigable.

Impatalged ti gobierno probinsial ti panangtulongna kadagiti manufacturers iti gastosda apaman a maiyimplimentar dagiti napagtutulagan a panagbalbaliw iti parupa dagiti produkto.#