Footer

Sangaili, pinapatayda iti kasaran

MAGSINGAL, Ilocos Sur – Napapatay ti maysa a sangaili bayat ti pannakipagragsakna iti maysa a kasaran idiay Sitio Dinumaran, Barangay Patong ditoy nga ili idi agarup ala una ti bigat ti Pebrero 15.

Dagus a natay ni Enrique Tugade y Barcena, 37, naasawaan, ken residente iti Barangay Cantoria, Juan Luna, La Union, gapu iti patal a sugatna iti ulo ken bagina kalpasan a pinaltogan ti dua a di nabigbig a suspek.

Segun iti inbestigasion dagiti nagresponde a polis, madama ti panagiinom da Tugade, kaduana da  Ed Urmeneta, 49, ken Arnold Usana y Urbien, 30, agpada a residente iti nadakamat a barangay; ken  Milo Undiana y Usana, 45, residente  iti Barangay Sarsacarat iti paraangan dagiti nagkasar a Benigno ken Rubycon Undiana idi kellaat lattan nga immasideg dagiti suspek a nakaaramat iti bonete ket pinaltogan ti maysa iti sumagmamano a daras ti ulo ken bagi ti biktima.

Naglibas dagiti suspek a nagturong iti amianan a direksion kalpasan ti pammaltog.

Nakarekobre dagiti polis iti dua a kapsula manipud iti M14 rifle iti nakapasamakan ti krimen.

Saan pay nga ammo ti motibo ti nasao a pammapatay.

Immun-una ngem daytoy, idi agarup alas 9:00 ti bigat ti Pebrero 12, napaltogan ti maysa a tricycle driver bayat ti panagdaliasatna iti national road a sakup ti Barangay Bayubay, San Vicente, Ilocos Sur.

Napaltogan ni Jayson Ruaro y Riepo, 39, naasawaan, ken residente iti Encarnacion Compound, Barangay Bayubay Sur, San Vicente ket naitaray iti Metro Vigan Cooperative Hospital iti Bantay, Ilocos Sur.

Idi damo, naireport iti police station ti San Vicente ti insidente a kas vehicular accident ngem bayat ti pannakataming ti biktima iti ospital, natakuatan a gapuanan ti paltog ti nangsalput iti baba ti lapayagna ken naisalat iti makannigid a pingpingna kas nasukalan iti X-ray examination.

Limtuad iti panagimbestiga dagiti polis a bayat ti panagdaliasat ti biktima a nakasakay iti traysikelna iti nadakamat a lugar, kellat a pinaltogan ti nakalugan iti motorsiklo a gun man a nakasugatan iti makannigid a pingpingna.

Mapapati a naglibas a nagpadaya ti suspek kalpasan ti pammaltog.

Iti pannakaisurat daytoy, di pay ammo ti naaramat a paltog ken ti motibo ti pammaltog.#