Footer

2 nagbungbong a mangngalap, natiliw

CAOAYAN, Ilocos Sur – Tiniliw dagiti polis ditoy ti dua a mangngalap a nasalamaanda nga agkalkalap babaen ti illegal a wagas iti kabaybayan a nagbeddengan ti Barangay Villamar ken Barangay Puro ditoy nga ili idi bigat ti Pebrero 21.

Nabigbig dagiti mangngalap a da Larry Agapinan y Dela Cruz, 56, naasawaan, ken Ruben Agapinan y Pinto, 30, naasawaan, agpada nga agnaed iti Barangay San Pedro, Vigan City.

Nagturong dagiti polis iti nadakamat a barangay kalpasan a nakaawatda iti tawag ti selpon manipud ken ni Villamar Barangay Captain Albert Quilenderino nga adda maisaysayangkat nga illegal a panagkalap iti kabaybayan a nagbeddengan ti Villamar ken Puro.

Bayat ti kaaddada iti igid ti baybay, nakangeg dagiti polis iti kanalbuong.  Naglugan dagiti polis iti bangka ngem idi makaasidegda, naglibas dagiti nagbungbong a nagturong iti sabasabali a direksion.

Dagiti laeng  dua nga Agapinan a naglugan iti de-motor a bangka a kolor asul ti nakamatanda.

Nakumpiska iti bangka dagiti suspek ti maysa a compressor, 2 rolio ti hose, maysa a floater, 2 a diver’s glass, ken 3 nga improvised a foot paddle.

Iti pannakaisurat daytoy, maisagsaganan ti kaso maikontra kadagiti suspek.#

Comments are closed.