Footer

Ago Bendito (Maudi a paset)

Nagunggon. Nagmulagat. Dagiti dadakkelna ti adda iti siledna.

“Nagtagtagainepka, Barok,” kinuna ti amana.

Nagmalmalem a pinampa-nunot dayta ni Itong. Ania ti kayat a sawen ti timek? Agpayso ngata adiay?

Nangarruba idi agalas-singkon. Agkakaribuso dagiti kapurokanna idi makagteng iti balay da Jingle a kasinsinna. Agbulbullagaw gayam ti agpito ti tawenna nga anak daytoy.

“Mangayabkayo iti traysikel!” adda nagkuna. “Agkombulsionen ti ubing!”

“Di met pay simmangpet dagiti kapurokantayo,” naisungbat.

“Mangkitakay iti bisikleta ta mapankay’ mangayab idiay haywey,” insuhestion ti sabali.

Di ammo ni Itong no apay ngem tinurongna ti kosina. Innalana ti sobra a gin ni kayongna. Nagpasalas.  Pinidutna ti bassit a lana iti altar. Kasta metten ti kandela.

“Yegyo ditoy ‘ta ubing pangur-urayantayo iti lugan,” nabileg ti timekna. Kasla adda mangiturturong iti sawenna.

Nagkikinnita dagiti kalugaranna. Nupay masmasdaaw met, nagtungpal ti kasinsinna. Madandanagan daytoy a nangyasideg iti anakna.

Pinasgedan ni Itong ti kandela. Nangibukbok iti arak iti baso nga inyabayna iti kandela. Pinulsuanna ti ubing. Kinurusanna iti arak ti rabaw ti siko daytoy sana pinatedtedan iti pulsona.

Nasdaaw ni Itong ta adda metten makitana iti uneg ti baso ken iti pulso ti ubing. Agpadada. Napupok a pudot ti manglokloko iti kaanakanna!

Inagawaanna a pinatallikud ti ubing. Nangibukbok iti lana iti imana ket inilutna ti ulo daytoy agingga iti ngatuen ti lapayag. Sa  inrusrosna ti dua nga urat iti agsumbangir nga abay ti duri. Namintallo nga inulitna.

Kalpasanna, timmakder. “Nalpasen,” kinunana. “Painumemto iti apaganem-em no agbirok iti danum,” kinunana ken ni Jingle.

Nupay sisisiddaaw pay laeng, impaimaan ni Jingle iti sensilio ti kasinsinna.

Inawat met ni Itong ti kurkurusna. Sinsao, nagawiden.

Idi dapadapen ni Jingle ti anakna, nasdaaw ta bimmaban ti gurigor daytoy. Umis-isem payen kenkuana.

DAYTA ti rugi ti panagagas ni Itong. Dina ammo ta kasla maipaltiing kenkuana no ania ti mayagas iti maiyeg kenkuana a pasiente. Kasla met x-ray wenno ultrasound ti panagkitana iti baso a nakargaan iti gin. Makitana ti naguneg ti pasiente. Maibagana no ania ti sakit daytoy. Makitana met no ranggas wenno nakadalapus ti ramut ti sagubanit.

Naynay nga umuli iti bantay ni Itong tapno agala kadagiti ramut ken tubbog ti lanlanut nga aramidenna nga agas. Kudkodenna dagitoy iti pino ket atay-atayenna segun iti klase ti sakit a maagasanda. Sakit ti ulo, trangkaso, panagbubussog, dinanum ti darana, narugit ti darana, ulaw, ebbal ken no ania la ditan.

Masmasdaaw dagiti pasientena ta uray dida sawen ti nasakitda, maibaga ni Itong. Ken adda agas nga itedna kalpasan a mailutna dagitoy. Maibagana pay ngamin ti immunan a naibaga ti doktor!

Dita a nagbilibda kenkuana. Nagangayanna, immadu ti pasientena. Itong Albulario, kunkunada kenkuanan.

Ti pagsayaatanna, umim-imbag met dagiti pasientena.

Ti pay ayatenda kenkuana, naangaw ket dina kedkedngan ti itangdanda. Makaammon dagitoy a mangipisok iti inaramidna a pagikkan a sinuratanna iti Donation Box.

Iti tunggal malem, di maliwayan ni Itong ti agyaman iti Dios iti inted daytoy a talugading kenkuana. Adu ti matultulonganna a kailianna. Adu payen ti agpapaagas kenkuana a taga-kabangibang nga ili.

Gapu itoy, nailiwliwagna ti napasamakna iti ayat. Nagsublin ti dati a riknana. Saanen a mayang-angin. Ammona itan ti sungbat dagiti saludsodna.

Saanen nga Itong Albulario ti awagda kenkuana. Binuniagan ni Mang Dexter iti Ago Bendito ta imbasarna iti teleserye iti telebision nga Agua Bendita. Napalaingna ti ulaw-ulaw daytoy. Agtutukel ngamin ti darana ket di makataray kadagiti urat isu nga agkurang iti oksiheno a mapan iti utekna ken kadagiti matana. Inikkanna daytoy iti napait a napulbos a lanut a pagdalus iti dara. Kalpasan ti makalawas, saanen a dimmukduko ti sakitna.

Maysa a malem, intarayda kenkuana ni Nana Inyang. Nakusbo kano lattan a makisarsarita. Nahayblad, a, adda nagkuna.

Sinantiguarna. Nagbara ti urat iti teltelna ta inappelan ti nagbalay a dara. Pinardasanna nga inrusros daytoy. Di nagbayag, nagmulagaten ni Nana Inyang. Napalalo ti yaman ni Charm nga itay pay a sangit a sangit ta impagarupna lattan a matayen ti inana.

“Dikay’ unay iti taba, Nana,” imbalakadna. “Agsublikayto no bigat ta sandokenka tapno maikkat ti gita ti lamiis nga adda pay kenka.”

“Agyamanak, Barok,” ki-nuna daytoy.  “Mano ngay ti itangdanko kenka?”

Pay man ta angawek, kinuna ni Itong iti nakemna. “Asawaek koma ti balasangyo, Nana,” kinunana yantangay adda met marikriknana nga ayat kadaytoy.

“Mayat la ketdi,” dina ninamnama a sungbat ti baket kenkuana.

Idi kitaenna ni Charm, awan ti reklamo daytoy.

Inkallaysa ngarud ni Itong ni Charm. Napalalo nga apal ni Mang Dexter kenkuana ta agpayso met a materiales puertes ti naasawana.

Pinagawid la ket ngarud ni Mang Dexter ni baketna. Agbabaiak no dika agawid! impangtana kano pay. Kalpasan ti makabulan, aginawen ni baketna nga agtawen iti kuarentay sais. Menoposal beybi, kinunkunada.

Di met nagpaudi ni Itong. Nakabukel a dagus! Ikarkararagna ta lalaki koma tapno addanto agtawid iti kina-Ago Benditona.#

Comments are closed.