Footer

I. Norte, Paoay sinelebraranda ti ‘Guling-guling’ 2012

By Florante A. Nicolas, PGIN/CMO

PAOAY, Ilocos Norte – Rinambakan ti provincial government ti Ilocos Norte ken ti munisipalidad ditoy ti ‘Guling-guling’ Festival, ti centuries-old a parambak a namirit kadagiti pagteng kas iti panaginom, panagsala, ken panagraragsak, iti maudi nga aldaw a panagrambak dagiti agnaed sakbay ti itatapog ti Semana Santa.

Nangrugi ti festival babaen ti maysa a trade fair idi Pebrero 17 a nakaitampokan kadagiti bukod a partuat ti Paoay kas iti inabel ken kornik.

Maysa a cultural show ken popularity contest ti naangay idi Pebrero 19 ken 20.

Idi Pebrero 22, kalpasan ti misa iti St. Agustine Church ken parada dagiti agnaed ken opisial ti ili, naglukat ti gastro fair a nakaipabuyaan ti panagaramid iti dudol ken naangay ti panagbirok iti kapintasan ti pannakadekorar a balay.

Nangrugi ti ‘Guling-guling’ dance parade iti 4:00 p.m. a nagpartisiparan dagiti nakaaruat iti native costumes ken nakatapis nga agnaed ken bisbisita a nagkakanta ken nagsasala iti kalsada.

Naisaruno iti 7:00 p.m. ti ‘Guling-guling’ showdown a nakisalipan dagiti sangapulo a contingents manipud kadagiti nadumaduma a barangay ti Paoay.

Segun ken ni Rod Sadian, organizing committee chairman for promotion, nagbalinen ti Guling-guling a kangrunaan a parambak a nangawis iti umad-adu a turista iti probinsia kadagiti naglabas a tawen.#

Comments are closed.