Footer

Nabartek nga ama, binagsolna nabartek met nga anakna

CANDON CITY – Agpadada a nabartek, ket saan a nagustuan ti ama ti panangunget ti anak kenkuana isu a binagsolnan a puon ti nakatayan daytoy.

Dead on arrival iti St. Martin de Porres Hospital a nakaitarayanna ni Bernie Calibuso y Disierto, 34, baro ken residente iti Barangay Bagar, ditoy siudad kalpasan a binagsol ti amana a ni Vicente Calibuso y Galicia, 60, naasawaan, residente met laeng iti nadakamat a lugar.

Iti inisial nga inbestigasion dagiti polis, sakbay ti insidente, simmangpet ti biktima a nabartek manipud iti drinking session iti barangayda ket mapapati nga inungtanna ti amana a nakainom met.

Nakarurod ti suspek ket nangala iti di ammo ti klasena a patadem sana binagsol ti biktima iti sumagmamano a daras iti tianna.

Naitaray met ti suspek iti St. Martin De Porres Hospital ngem dinawatna a maiyalis iti Candon City Hospital gapu kadagiti sinagrapna a dunor iti ulona gapu iti panangkabil kenkuana dagiti immarayat a kaarruba ken kakabagianda.#

Comments are closed.