Footer

Nakisang magatang a baboy para bagnet, longganisa

VIGAN CITY – Nakisangen dagiti magatang a baboy para iti maaramid a bagnet ken longganisa, daytoy ti pammaliiw ti mangimatmaton iti slaughterhouse ditoy siudad.

Kinuna ni Slaughterhouse Master Dr. Arnulfo Quitoriano a makadanon payen dagiti aggatgatang iti baboy kadagiti nasulinek a lugar iti probinsia tapno adda para maaramid a bagnet ken longganisa.

Sakbayna, adu dagiti oversized a baboy a maiserrek iti probinsia ket dagitoy ti gatangen dagiti agparparti ken aglaklako iti karne gapu ta nalaklaka ti presioda  ken ad-adda a kayat a gatangen dagiti agar-aramid iti bagnet ken longganisa a puon ti nagririan dagiti agtartaraken iti baboy iti probinsia.

Segun ken ni Quitoriano, nupay saan pay a problema ti maparti a baboy iti slaughterhouse ditoy Vigan kalpasan ti panangibilin ni Gov. Luis “Chavit” Singson ti pannakaiparit ti pannakaiserrek dagiti oversized a baboy iti probinsia, pammaliiwna ket agproblemanto iti maparti a baboy kadagiti sumaganad nga aldaw.

Kinuna ni Quitoriano a nasurok a 70 a baboy ti maparti iti slaughterhouse iti inaldaw.#