Footer

Sensitibo unay dagiti agilinlinteg

Nakaay-ayat dagiti agilinlinteg ditoy pagilian ta maseknanda unay iti imaheda kadagiti tattao. Kayatda nga iti mata ken panunot dagiti umili: nadayaw, honorable, maraem, pagwadan, nadalus, nasin-aw, mapagpiaran, awanan mulitda nga agtuturay. No palaluen ti manarita, daydiay imahe a saan a makapettak iti bulong, kasla tay sarming a “babasagin”.

Makita ti naipanurok a panangsalaknib dagiti agilinlinteg iti imaheda, nangruna dagiti adda iti House of Representatives babaen ti maysa a gakat nga impila ti maysa a kabaddungalanda itay nabiit.

Daytoy ti House Bill 2140 nga impila ni Diputado Aurelio “Dong” Gonzales, Jr. ti maikatlo a distrito ti Pampanga, no sadino a naidagadag ti pannakaipabassit, pannakalapped wenno pannakaisardeng ti panangiparang kadagiti miembro iti House of Representatives kas managdakdakes, kriminal wenno panaglabsing iti linteg iti sine wenno telebision.

No suroten ti panagtaray ti panunot ni Gonzales, no kastoy ti pannakaiparang wenno pannakailadawan dagiti kongresman iti telebision ken sine, maimpluensiaan ti publiko a pakairamanan dagiti ubbing a maaddaan iti negatibo nga impression kadagiti agilinlinteg.

Nakakatkatawa daytoy. Iti pelikula wenno TV a Pilipino, natural nga adda latta daydiay kontrabida a mangted iti risiris tapno maabbukay ti interes iti publiko a mangituloy iti panagbuyada agingga iti kanibusanan. Ania koma ti dakesna no managdakdakes ti congressman iti pelikula, kas met iti kaadda dagiti maiparang a dakes nga agtuturay, polis, ken uray pay papadi? Pelikula laeng daytoy, ngem naipakita ti maysa a ilgat ti pudno a biag, nga adda met dagiti maibilbilang a maraem a tattao ngem rinuker gayam ti nagunegda.

Ngem akuen man wenno saan dagiti kongresman, saan a kasta kangato ti panagkita dagiti umili kadakuada.  No agilinlinteg kunam, umuna ketdi nga umapay iti panunot dagiti tattao dagiti imbutosda iti poder a napulapolan kadagiti anomalia, panagkunniber, kinamanagimbubukod, tay bukodda nga interes ti immuna a tinamingda idinto nga impalikudda ti interes ti pagilian.

Mabalin nga ipettengda nga awan ti kinaagpaysona dayta a banag. Ngem nasakit nga annugoten a sabali ti imahe a kayatda a pakailadawanda iti imahe ti kaadduan kadakuada nga adda iti panunot dagiti tattao.

Sensitibo unay dagiti agilinlinteg. No mabalin, dida kayat ti mapilaw wenno mababalaw uray agdadata nga adda uging iti imada, wenno nasukalanda a kimmaut iti sarusar ti pagilian. Kalubanda ketdi ti dakes nga aramidda ket kakaasi piman dagiti nagtured a nagibulgar kadagiti anomaliada ta isuda pay ketdin ti nagbalin a kangrunaan a suspek a naglabsing iti linteg.#