Footer

BANNER NEWS: Grupo agtaktakaw iti motorsiklo, masipsiputan: Vigan City COP

VIGAN CITY – Maysa a grupo a masuspetsa nga adda pannakainbolbarna iti panagtakawan iti  motorsiklo iti siudad ti Vigan ti sipsiputan dagiti polis ditoy.

Daytoy ti impalgak ni OIC COP Police Chief Inspector Ernesto Navarro kas reaksionna iti nagsaruno manen a panagtakawan iti motorsiklo ken traysikel iti tiendaan publiko idi parbangon ti Abril 17 ken 18.

Makalawas laeng kalpasan ti pannakatiliw ti dua a suspek iti panagtakawan iti motorsiklo, naireport a nagsaruno a parbangon a natakaw ti Honda XRM a motorsiklo ni Roxy Paat y Rabang, 36, naasawaan, agparparti, ken residente iti Barangay Tamurong, Sta. Catalina ken ti traysikel a Honda 155 a maris asul a kukua ni Marcelino Castillo Peria, 54, naasawaan, ken residente iti Barangay Taguiporo, Bantay, Ilocos Sur a linuganan ni Bonimark Peria y Cordero, 21, baro, ken residente iti nadakamat a lugar idi napan nagdeliber iti natnateng iti maysa a sukina iti Vigan City public market.

Di pay ammo ti kinasiasino dagiti nagtakaw.

Ngem kinuna ni Navarro nga adda sipsiputanda a grupo a suspetsada a nangisayangkat iti panagtakaw kadagiti nasao a lugan.

Iti saludsod ni Jun Ramos, anchor ti Barangay Commando Brigada no adda organisado a grupo nga agtaktakaw iti motor, kinuna ni Navarro a “mabalin” sana innayon nga adda maysa a grupo a kitkitaenda nga agtaktakaw iti motorsiklo nga ilakoda ti motor dagitoy a maikabit kadagiti bangka a pagkalap.

Ngem inyunay-unay ti COP a madama pay la ti balidasionda iti daytoy a naammuanda.

Segun ken ni Paat, imparkingna ti motorsiklona a iti uneg ti tiendaan publiko a saan a natulbekan idi agarup alas 3:00 ti parbangon ket idi agsubli iti agarup 3:30, awanen ti luganna iti nakaiparkinganna.

Nairaman a napukaw ti resibo ken certificate of registration ken health certificate a naikabil iti uneg ti compartment ti nasao a motorsiklo.

Nangipatulod ti police station iti flash alarm kadagiti kabangibangna a police stations ngem negatibo ti resultana.

Naammuan met ken ni Peria nga imparkingna ti traysikel iti amianan a daya a paset ti Vigan City public market iti agdeliber iti natnateng idi agarup 3:30 ti parbangon  ti nadakamat a petsa ngem idi nagsubli, awanen ti lugan iti nakaiparkinganna.

Iti panagimbestiga dagiti polis, mapapati a nakaaruat ti mannanakaw iti brown a tisirt, short pant, atiddog a kulot ti buokna nga adda kallugongna ken agtayag iti 5’3”.

Kinuna ni Navarro a paingetanda pay ti police visibility ket isayangkatda ti checkpoint kadagiti lugar a nakapasamakan dagiti insidente ti panagtakaw ken iti oras a pannakaisayangkatda.

Idi Abril 9, tiniliw dagiti polis Sto. Domingo Rodrigo Lazo y Gamurot, 16, ken John Rey Reotutar y Plastina, 18, kalpasan a narekobre iti ikutda ti maysa a motorsiklo a mapapati a tinakawda iti Barangay Pantay Daya idi Abril 3.

Idi rabii ti Abril 10, natakaw ti XRM a motorsiklo ni Roy Valencia y Laurente, 25, nga imparkingna iti parking area ti Gabriela Silang General Hospital iti Barangay Tamag sana napan binantayan ti asawana a naganak.#

Comments are closed.