Footer

Iti Kuadrado a Lubong ni Emmanuel (Maudi a paset)

Sarita ni Salvador A. Espejo

 

Saan a nagbiddut ni Emmanuel. Di mabayag, agtartaray ti kabit ni Mr. Solsona a nanglasat iti pasilio sa nagkamang iti elebeytor. Iti ruangan ti opisina, agbasbasawang ni Mrs. Solsona idinto nga igawgawid ni lakayna. Naggaarimutong iti pasilio dagiti empleado a natukay iti panagtabtabbaaw ni Misis Solsona.

Dinagdagus ni Emmanuel nga intangep ti ridaw. Pinindotna ti buton ket naguyas ti elebeytor nga agpababa.

Imbes a pungtot, asi ketdi ti immapon iti barukong ni Emmanuel idi taliawenna ti babai nga agsasaibbek itan iti suli. Saan a nailaksid iti imatangna ti limmitem a pingping ken bimtak a bibig ti babai. Mano ti kas kenkuana a naganus unay a naipako iti nasalimuot a panagbiag?

Inlukat ni Emmanuel ti ridaw. Atibayenna koma ti babae ngem nagtaray daytoy a kimmamang iti ruangan, sangkasarapana ti napisang a badona. Nabennat ti tengnged dagiti adda iti lobby.

Nakamattider pay laeng ni Emmanuel iti ridaw ti elebeytor idi umaweng ti sirena. Panaggaawid gayamen, nakunana.

Madamdama, ragupen dagiti empleado nga itulodna iti ground floor. Tunggal maysa, magsiganat nga aggawid tapno aginana. Sumagmamano nga agtutubo ti nangegna nga agtutulag a dumagas iti beerhouse.

Immanges ni Emmanuel iti nauneg kalpasan ti iruruar ti kaudian a pasaherona. Inunnatna ti bukotna sana imbakal ti panagkitana iti ulilan a lobby. Iti ruar, nagdalapdapen ti sipnget a pilit nga iwaksi dagiti naraniag a silaw. A, maysa manen a panid ti panawen ti maikupin, naisipna. Inton bigat, ania ti agur-uray a pagteng kenkuana?

“Itulodnak man iti opisinak, Emmanuel,” adda nagtimek iti ridaw.

“Sika gayam, Mr. Roman,” nakuna ni Emmanuel. Inrikepna ti ridaw sana pinindot ti puraw a buton. Naguyas a nagpangato ti elebeytor.

“Adda nangbirbirok kaniak?” inamad ni Mr. Roman.

“Maysa a lalaki, Mr. Roman. Umaynaka koma singiren.”

“A-agsingir?” immatap ti mata ni Mr. Roman. “Ania ti langa dayta a lalaki?”

“Nabaneg. Nataytayag lat’ bassit ngem siak. Agkataebkami. Adda sallapiding iti babaen ti makannawan a matana.”

“Awan am-ammok a kasta ti langana.”

Nagari ti ulimek. Kinaut ni Mr. Roman ti paniona sana pinunasan ti ling-et iti mugingna.

“Urayennakon,” kinuna ni Mr. Roman idi makagtengda iti maikapito a kadsaaran. “Diak agbayag. Adda la alaek iti opisinak.”

“Wen, Mr. Roman,” insungbat ni Emmanuel. Saannan nga intangep ti ridaw.

Madamdama, nagsubli ni Mr. Roman. Adda bitbitna nga attache case.

Irikep koman ni Emmanuel ti ridaw idi kellaat a naikuadro ti lalaki nga agsingir iti pautangna. Naglumen ti isem nga ipaayna koma iti lalaki idi mataldiapanna ti paltog nga inuyos daytoy iti bassit a bag.

“A-ania ti kayat a sawen daytoy?” naimaldit ti buteng iti rupa ni Mr. Roman.

“Kamaudianan, nasalamaanka met laeng,” kinuna ti lalaki. “Nabayag a pinadpadaanak daytoy a kanito tapno agsingirak iti pautang.”

“A-awan utangko kenka. Dika am-ammo.”

“Dakkel ti utangmo kaniak,” timmangken ti timek ti lalaki. “Kurang pay ti biagmo a pagbayadmo.”

Tinaldiapan ti lalaki ni Emmanuel. “Paandarem ti elebeytor nga agpababa,” imbilinna. “Dika agpauneg iti sabali a pasahero, maawatam?”

Nagtung-ed ni Emmanuel. Pinindotna ti nalabaga a buton.

“Sakbay a makagtengtayo iti ground floor, aggibus metten ti biagmo, Mr. Roman!” ingngirsi ti lalaki.

“S-sinoka?” nagtigerger ti timek ni Mr. Roman. “A-apay a kayatnak a patayen?”

“No malagipmo pay, nagtalek ti maysa a babai iti karim. Ngem kasla abalbalay nga impalladawmo kalpasan a naumaam. Iti bainna, nagpakamatay ti babai. Timmapuak iti maikapito a kadsaaran iti daytoy a pasdek.”

Naikuleng ni Emmanuel. No kasta, kabsat ni Malou de la Cruz daytoy kasangsangoda!

“Agkararagkan! Dimtengen ti panungpalam!”

“K-kaasiannak, dinak patayen…” dandani di sumngaw ti timek ni Mr. Roman.

“Tinaliawmo kadi ti kabsatko idi kasapulanna ti asim?” inridis ti lalaki. Nagngariet a nangkalbit ti gatilio. Nagikkis ni Mr. Roman a nangapput iti barukongna. Nagpugso manen ti paltog. Kasla nambaan ni Mr. Roman a nanabtuog iti suelo.

“Pagsardengem ti elebeytor,” imbilin ti lalaki.

Nagtungpal ni Emmanuel. Addadan iti maikatlo a kadsaaran.

Impaturong ti lalaki ti umas-asuk pay laeng a paltog ken ni Emmanuel. Nagkintayeg ni Emmanuel idi maamirisna ti panggep ti lalaki.

“A-awan basolko,” kinunana ket simmalipengpeng iti suli.

“Ammok,” insungbat ti lalaki. “Ngem awan pagpiliak. Nasaksiam ti pammapatay ket kapilitan nga ipaknika met.”

“K-kaasiannak koma. A-adda pamiliak…”

“Ladingitek,” kinuna ti lalaki ket kinalbitnan ti gatilio.

Narikna ni Emmanuel ti napudot a buli a nangarado iti barukongna a kagiddan ti iduduyok ti saem. Kasla dimmanum dagiti tumengna ket naarinuknok iti suelo.

Iti nakadalebanna, nalawag a mangegna ti panaglukat ti ridaw sa dagiti agdardaras nga arimpadek iti pasilio agingga iti nagpukawda iti pagagdanan.

Inulod ni Emmanuel ti bagina agingga iti yan ti bangkito. Inangayna ti nabati pay a pigsana a tumakder. Umanges-anges a nagsadag iti diding. Rinam-edanna ti buton.

Manen, dimmuyok ti saem. Mariknanan ti kapsutna. Pagammuan, nagallon ti panagkitana ket nadaleb.

Kinamatna ti angesna. Agpadpadaan itan dagiti aggiina, immagibas iti isipna.

Nagtuloy ti panaguyas ti elebeytor nga agpababa. #

Comments are closed.