Footer

Gobierno ti Siudad ti Vigan, nakasaganan a mangselebrar Viva Vigan Festival of the Arts

VIGAN CITY – Nakasaganan daytoy a siudad a mangselebrar iti kangrunaan a parambakna a Viva Vigan Festival of the Arts.

Pinal a nagmimiting itay Abril 17 dagiti city officials, barangay officials, NGOs, sektor ti negosio,  dadaulo dagiti pagadalan babaen ti panag-preside ni Konsehal Janina Carine Medina-Fariñas ket pinalanasda dagiti nadumaduma nga aktibidad tapno naballigi ti pannakarambak ti Viva Vigan Festival of the Arts.

Adda laeng sumagmamano a nagbaliwan dagiti aktibidad tapno nasaysayaat ti pannakaiwarasda ket mamentener ken maay-ayo dagiti turista ken sangsangaili nga agintek ditoy siudad.

Mangrugi ti parambak inton Abril 28 ken aggibus inton Mayo 6, segun ken ni Medina-Fariñas.

Maangay ti Abel Iloco competition ken Abel Iluko Fashion Show  iti Mayo 5 imbes nga Abril 28 a pannakaangayna koma.

Kasta met a ti Disco sa Kalye a maangay koma iti Mayo 5 ket maipan iti rabii ti Abril 28.

Mainaguraran inton Mayo 3, kaaldawan ti piesta, ti Vigan City Convention Center.

Kinuna ni Mayor Eva Marie S. Medina a naipatakder ti nasao a convention center gapu iti arungaing dagiti dadakkel a pasdek negosio ken gunglo a maaddaan daytoy a siudad iti pagkumbension.

Innayon ti mayora nga ad-adu pay ti maawis a turista iti pannakaipatakder ti convention center ket mabatir ti ekonomia ti siudad agsipud ta mangipaay daytoy iti ad-adu a pamastrekan kadagiti otel, restaurants, antique and souvenir shops, kalesaan, ken dagiti agar-aramid iti bagnet, longganisa, empanada ken dadduma pay a delicacies ti Vigan City.

Maangay metten ti Binatbatan Festival street dancing competition iti malem ti Mayo 6, maudi nga aldaw, ken ti showdown iti karabianna.

Manamnama ti panagdudupudop ditoy siudad dagiti rinibribu a turista manipud kadagiti nadumaduma a paset ti pagilian ken iti ballasiw-taaw tapno imatanganda ti Binatbatan Festival a pakaitampokan iti Abel Iloco, maysa kadagiti kangrunaan a produkto ti siudad.

Dagiti naisagana nga aktibidad iti pannakarambak ti Viva Vigan Festival of the Arts:

 

April 28: Floral Offering

Opening of Viva Vigan: Trade fair, food fair,  calesa parade, San Miguel Beer Disco sa Kalye

 

April 29: Sanggunian ng Kabataan Day

 

April 30:  Bankathon, fishing competition

 

May 1:  carabao painting,  Boklan Art

 

May 2:   Traditional games, Gay’em parade

 

May 3:  Holy Mass in honor of Apo Lakay,  RAMADA games, inauguration of Vigan Convention Center

 

May 4: Free anti-rabies dog vaccination, dog show, Santacruzan

 

May 5:  Duathlon,  Heritage Fun Run.#

 

May 6: Binatbatan Street Dancing Competition