Footer

35 nga estudiante naikkan iti summer job

SAN JUAN, Ilocos Sur – Tallopulo ket lima nga estudiante ti nakualipika nga agtrabaho ita a kalgaw iti sidong ti lokal a gobierno ken ti social welfare and development office ditoy , daytoy ti impakaammo  ni MSWD officer Criselda Navarro itay nabiit.

Kinuna ni Navarro a nangrugi dagitoy nga estudiante nga agtrabaho itay Mayo 2 ket naiwarasda kadagiti amin a barangay ditoy nga ili a tumulong para iti pannakamonitor ti pannakaipatungpal ti Pantawid Pamilyang Pilipino Program (4Ps) daytoy nga ili.

Sakbay ti iseserrekda iti summer job, naglasat nga immuna dagiti estudiante iti orientasion para iti naannayas a panangakemda iti trabahoda.

Nairanta ti summer job para kadagiti nasao nga estudiante tapno adda katulongan ti opisina ti MSWD iti pannakamonitor iti implementasion ti 4Ps kadagiti amin a barangay ditoy nga ili.

Agpaut nga agtrabaho dagiti estudiante iti 52 nga aldaw ket agsueldoda iti P246 kada aldaw.#

Comments are closed.