Footer

Class Sinag-lahi, immuli iti Tirad Pass

GREGORIO DEL PILAR, Ilocos Sur – Nasurok dua gasut a kadete ken opisial ti Philippine Military Academy ti immuli iti Tirad Pass Shrine ditoy nga ili idi Mayo 5 tapno agruknoy iti maingel a bannuar, ni Hen. Gregorio del Pilar.

Agdagup iti 190 a kadete ti Class Sinag-lahi ken nasurok a 30 nga opisial ti immuli iti nasao a bantay babaen ti panangidaulo ni B/Gen. Carlos Quita, commandant of cadets ti PMA.

Sinarabo ni Del Pilar Mayor Luz Villalobos dagiti sangaili ket kimmuyog pay nga immuli iti tuktok ti Tirad Pass.

Kinuna ni Quita nga insayangkatda daytoy tapno makitada a mismo ti lugar a sinalakniban ni Hen. del Pilar tapno makalibas ni Hen. Emilio Aguinaldo iti panagturongna iti Cordillera.

Impalgak ni Quita a malaksid ti Tirad Pass Shrine, pasiarendanto pay ti Mt. Samat, Corregidor, Bataan, ken dadduma pay a lugar nga adda dakkel akemda iti historia ti pagilian ken iti militaria.

Daytoy ti maikapat a bunggoy ti PMA nga immuli iti Tirad Pass Shrine.#

 

Comments are closed.