Footer

Dati a bise mayor ti Sto. Domingo, gun for hire nangpapatay

SAN ILDEFONSO, Ilocos Sur – Matangtangdanan a pumatay ti pinilaan dagiti polis ditoy nga ili iti kaso mainaig iti pannakapapatay ni dati a Sto. Domingo Vice Mayor Anthony Que y Purisima idi Enero 31 iti Barangay Poblacion West, San Ildefonso.

Kinuna ni COP Senior Inspector Juan Abaya a naipilan ti kaso a murder maikontra ken ni Jessley Tugadi @ Tikong ken John Does iti provincial prosecutor’s office idi Mayo 8.

Iti pannakiuman ni Peter Rebunal, reporter ti DWRS, ken ni Abaya a naipatangatang iti Barangay Commando Brigada ni anchorman Jun Ramos, kinuna ti hepe a dua a saksi ti nangbigbig iti suspek a maysa kadagiti nangisayangkat iti pannakapapatay ti dati a bise mayor.

Nupay kasta, mabirbirok pay ti suspek a mapapati a nainbolbar iti kallabes kadagiti sumagmamano a pammapatay iti probinsia.

Kasta met a saan a nadakamat ti hepe no asino ti mapapati a nangtangdan iti suspek a mangpatay iti bise mayor.

Madama nga agpatpatang ni Que, 55, ken ni Arlene Tubon y Tubon, 26, taga-Barangay Napu, Sto. Domingo, Ilocos Sur, naasawaan, idi rabii ti Enero 31 iti likudan ti Recel apartment iti Barangay Poblacion West, San Ildefonso idi pinaltogan dagiti di pay nabigbig a suspek a mapapati a nagpuesto iti alad a malikudan ti biktima ken ni Tubon.

Dua ti anggulo a kitkitaen dagiti inbestigator: no adda pannakainaig ti pammapatay iti politika wenno love triangle.

Mapapati a karelasion ti biktima ni Tubon nga asawa ti maysa a Filipino American nga agnanaed iti Hawaii.

Intaray dagiti nagresponde a polis ni Que iti Metro Vigan Cooperative Hospital ngem indeklara ti nangtaming kenkuana a doktor a dead on arrival.

Nakarekobre dagiti inbestigador iti tallo a kapsula ti cal .45 ken 5 a kapsula ti cal .9mm iti nakapasamakan ti krimen.

Iti immun-una nga interbiona ti media kalpasan ti pammapatay,  kinuna ni Abaya nga adda nakakita iti dua a tattao a napardas a  nagpalaud a nagnagna sada naglugan a naglibas. Nupay kasta, saan a nailasin dagitoy agraman ti numero ti naglugananda gapu ta nasipnget.

Para iti madagdagus a pannakasolbar iti pammapatay, nangitanggaya ni Gov. Luis “Chavit” Singson iti P100,000.00 iti asino man a makaited iti impormasion mainaig iti kinasiasino dagiti pimmatay.

Nangbuangay met ni Police Senior Supt. Noel Baguitan Amoyen, DSC, iti investigation team a binukel dagiti polis ti provincial police office a pakairamanan ti ISCIDT ken provincial crime laboratory, tapno mangiwayatda iti naing-inget nga inbestigasion mainaig iti pannakapapatay ti dati a bise mayor.

Nagkandidato ni Que a bise mayor ti Sto. Domingo, katiket ni dati a Congressman Mariano Tajon idi napalabas nga eleksion ngem naabak.#

Comments are closed.