Footer

Iti panagkaradap ti sipnget (Umuna a paset)

Sarita ni Salvador A. Espejo

 

TINALDIAPAK ti oras iti pungupunguak. Dandanin alas onse iti rabii. Diak nagawidan ti ibubulos ti nauneg a sennaayko. Ammok lattan a naisagud manen ni Daniel iti paginuman.

Saan met a kasta ni Daniel. Nangrugi laeng idi agalenna ti panagsakitsakit ti ulona. Idi damo, diak intaltalek. Nasayaat ta makapagrelaks, nakunkunak iti nakemko. Ngem rinabii metten a maladaw a sumangpet iti balay.

Kinupinko ti basbasaek itay a pagiwarnak sako impakni iti sirok ti nagtimbukel a lamisaan. Linukatak ti telebision. Ngem saanko a maipamaysa ti buybuyaek. Sangkaalingagko ti daranudor ti lugan ti kalsada.

Iniddepko ti telebision saak nagpakusina. Naggaoak. Ngem awan ti ganasko a mangan. Nalamiisen ti pangrabii.

Nagsubliak iti salas. Tinaliawko ti oras. Dandanin agalasdose. Nagsennaayak manen idinto nga inyiladko iti sopa. Diak napupuotan a nairidepak.

Nalukagak iti napigsa a banarubor ti lugan iti sanguanan ti balay. Linukipko ti kurtina. Nakaangesak iti nalukay idi makitak ni Daniel a sumrek iti inaladan. Bimabaak ket inlukatko ti ridaw.

“Siririingka pay gayam,” kinuna ni Daniel.

“Nakainumka manen,” nakunak.

Kinuti laeng ni Daniel ti abagana. Linabsannak. Inuksobna ti polo barongna sana impalladaw iti sopa.

“Igaw-ankan? inamadko.

“Diak mabisin,” insungbat ni lakay.

“Arak lattan ti pangrabiim? Kasanon ti salun-atmo? Kitaem, adun ti rimmapisam.”

“La, huston.” Maturogta ketdin.”

Immuneg ni Daniel ti siledmi. Nagidda. Madamdama, agur-uroken.

Naamilko ti bibigko. Namalbaliwen ti asawak. Mabaybay-annakamin. Dina payen makalanglang ni Lingling, ti bugbugtong nga anakmi.

Adda kadi nagkurangak? Ngem awan met ti ammok a pakaupayanna iti panangasikasok kenkuana. Tartaripatuek met ti bagik ket di pay nagkupas ti kinapintasko.

Adda ngata sabali a babai iti biag ni lakay? A, saan a maaramid  ni Daniel dayta, impetteng ti riknak.

NUPAY napuyatannak, nasapaak a bimmangon. Tinulongak ni Ising, ti balasitang a babaonenmi, a mangisagana iti pammigat. Paborito dagita ni Daniel.

Madamdama, nagpakusina ni Daniel. Ngem nalidem ti rupana a simrek iti banio.

“Agidasarkan, Ising, ta mangantayon,” kinunak kalpasan a makadigos ni lakay.

“Manganakton iti kantina ti opisinami,” kinuna ni Daniel. “Adda ikamakamko a report.”

Intulodko ti asawak iti ridaw. “Adda nalipatam,” kinunak idinto nga intanggayak ti pingpingko.

“Bay-am daytan.” kinuna ni lakay. Pinidutna ti attache case ket intarengtengnan ti rimmuar iti inaladan.

Insursurotko ti panagkitak iti likudan ti asawak. Napukaw ti ganaygayko.

Nakariingen ni Lingling.

“Ni Daddy, mommy?” inamad ni Lingling.

“Simreken iti opisina, nakkong,” insungbatko idinto a kinibinko a napan iti kusina.

“Nakasasaur ni Daddy,” nagmirugrog ni Lingling. “Nakaladladaw a sumangpet, nasapa met a pumanaw.”

“Adu ngamin ti trabahona, nakkong. Bay-am ta intayonto agpipiknik inton Domingo.”

Dinigosko ni Lingling idi makadalusak iti balay. Inkuyogko iti tiendaan. Gimmatangak iti manok a laokak iti paria ken sotanghon. Nangalaak pay iti sangakilo a malaga a sigangek.

Parpartiek ti manok idi agkiriring ti telepono. Ni Daniel.

“Diak agawid no aldaw,” kinunana. “Nagawis iti pangaldaw ni Andy. Kasangayna.”

“Maladawka a sumangpet no malem?” sinaludsodko.

“Agpa-San Fernandoak iti alas dos ta adda emergency a mitingmi. Rabiinton no aggawidak.”

Kellaat a naglumen ti ganaygayko.

DOMINGO. Nakasukaten ni Lingling. Naisaganak metten ti balonmi. Kas naikarik, agpiknikkami iti Heritage Beach Resort iti Caoayan.

Simrekak iti siledmi nga agasawa. Taptapayaen ni Daniel ti ulona, adayo ti turong dagiti matana.

“Kunak man no nakasukat-kan?” nakunak. “Sika laengen ti ur-urayenmi.”

“Dakayo laengen ti mapan,” insungbat ni lakay. “Agsakit ti ulok.”

“Ita man laengen a makakuyogmo ti anakmo, paayem manen?”

“Madi ti riknak, kunak ngaruden, dika makaawat?”

Saannak a nakatimek. Ita la a bugkawannak ni Daniel. Leppay ti abagak a rimmuar iti siled. Sinabatnak ni Lingling.

“Di met umay ni Daddy, Mommy?” sinaludsod ni Lingling.

“Agsakit ti ulo ni Daddym, nakkong,” insungbatko. “Datan, a, ti agtuloy.”

Nabayag nga inuyotak ti anakko sakbay nga immannugot. Idi agpakadakami nga agina, di man la timmaliaw ni Daniel. Nadagsen ti barukongko bayat ti panagtaray ti traysikel nga inarkilami. Makasangitak ngem linapdak ta diak kayat a madlaw ni Lingling.

Alas dos iti malem idi agawidkami. Dimi nasangpetan ni Daniel.

“Rimmuar kalpasan ti pangaldaw, manang,” kinuna ni Ising. “Dinagas ni Manong Andy. Mapanda kano makitong-it dita Paratong.”

Nagkuretret ti mugingko. Kaano pay a nangrugi ni Daniel nga agsugal?

(Adda tuloyna)

Comments are closed.